Semeıde tasqyn kóne zırat pen kópirdi shaıyp ketti
ASTANA. 10 sáýir. QazAqparat - Semeıde Salqyn Qaınar eldi mekeniniń turǵyndary amaldyń joqtyǵynan qaraýsyz qalǵan zırattaǵy tabyt synyqtarynyń jáne adam ashylyp qalǵan súıekterdiń janynan ótip júr.
Olar kúnine birneshe márte aýyldy qalamen baılanystyratyn jartylaı qıraǵan kópir arqyly qatynaıdy. Bul týraly «Vremıa» gazeti búgingi nómirinde jazyp otyr.
Eski qorymdy da , kópirdi de tasqyn sý shaıyp ketken. Ótkeldiń bir bóligi 17 naýryz kúni opyrylyp qalǵan. Qala basshylyǵy onda kólikterdiń qatynaýyna shekteý qoıdy. Biraq sheneýnikterdi halyqtyń kópirdiń synyqtary arqyly armatýrasy soraıyp shyǵyp turǵan shuńqyrlardyń tap shetimen qatynaıtyny alańdatpaıtyn kórinedi.
Ótkel jartylaı qıraǵan soń, jergilikti turǵyndar ózderin bázbir shekarany kesýshi dıversant retinde sezinetin boldy. Avtobýs halyqty eldi mekennen kópirge deıin ǵana jetkizedi. Qaýipti ótkelden áýpirimmen zorǵa ótken soń olar qalaǵa barý úshin taǵy bir qoǵamdyq kólikti tosady.
«Kópirdiń opyrylyp qulaǵanyna úsh apta boldy. Biraq armatýrasy soraıyp shyǵyp turǵan shuńqyrlar sol kúıi qorshalmaı jatyr. Eger jolaýshy abaısyzda qate qadam bassa, shuńqyrǵa qulap túspek. Nelikten olardy ýaqytsha plıtalarmen qorshamasqa? Alaıda qala basshylyǵy tasqynnyń aıaqtalýyn kútetinin málimdegen. Sodan keıin ǵana olar jóndeý jumystaryna kirispek.
Semeı qalasynyń turǵyn úı kommýnaldyq sharýashylyq, qoǵamdyq kólik jáne avtokólik joldary bóliminiń bastyǵy Orynǵalı Ysmaıylov keshe ótken baspasóz máslıhatynda ázirge kúrdeli jóndeý jumystaryna qajetti 35 mıllıon teńgeniń qolda joq ekenin, tek ýaqytsha jóndeý júrgizilip, shuńqyrǵa qıyrshyq tas salynatynyn habarlady. Abyroı bolǵanda, kópirdiń baǵandary saqtalǵan. TKSh bastyǵynyń sózinshe, qaýipti ýchaskedegi jaryqtandyrý buryn da bolmasa, alda da bolmaıdy.
Ysmaıylovtyń aıtýynsha, sý shaıyp ketken zırattaǵy adam súıekteri qaıta jerlenbek. Qorym osydan 50 jyl buryn jabylǵan bolatyn. Qazirgi normalarǵa sáıkes ony tegistep, saıabaq ashý qajet.
