Semeıde tarıhı ǵımaratty buzbaq bolǵan kásipkermen kelissóz júrgizildi

SEMEI. QazAqparat - Semeı qalasynda jeke kásipkerge tarıhı ǵımaratty buzýǵa jol berilmedi, dep habarlaıdy QazAqparat tilshisi.

ShQO ákimi Danıal Ahmetovke Semeı jurtshylyǵy, zııaly qaýym ókilderi men mádenıet qyzmetkerleri tarapynan Naımanbaev kóshesi boıynda ornalasqan 1844 jyly salynǵan kópes úıiniń ǵımaratyn buzǵyzbaı saqtap qalý jóninde birneshe hat túsken.

- Osydan onnan astam jyl buryn ǵımaratty jeke kásipker alyp, onyń janyna saýda úıin salǵan. Qazir ol bul jerde turǵyn úı salý úshin burynǵy murajaıdy buzbaq oıy bar. Sol úshin Semeıge jumys saparym barysynda eski ǵımarattyń ıesimen kezdestim. Oblystyq mádenıet basqarmasy atalǵan sáýlet eskertkishiniń tarıhı qundylyǵy týraly barlyq qajetti qujattardy daıyndady. Sonymen qatar biz 177 jyldyq tarıhy bar saýdager úıiniń bastapqy kelbetin qalpyna keltirý úshin aqsha bólemiz, - dedi aımaq basshysy.

Onyń aıtýynsha, bolashaqta munda murajaı fılıaldarynyń birin ornalastyrýǵa nemese jyljymaly kórmeler uıymdastyrýǵa bolady.

- Osylaısha, Semeıdiń ár turǵyny men qonaǵy qalanyń tarıhyna úńile alady. Árıne, sáýlet eskertkishi ıesiniń bul jerge kóppáterli turǵyn úı salǵysy keletini quptarlyq jaǵdaı. Degenmen, shahar ákimdigi jýyq arada kásipkerge qalanyń shaǵyn aýdandarynyń birinen jer telimin usynatyn bolady, - dedi Danıal Ahmetov.