Semeıde sýǵa batyp bara jatqan adamdy qutqarǵan eki jigit marapattaldy
SEMEI. QazAqparat – Semeı qalasynda adam janyn ajaldan arashalap qalǵan eki jigit QR Tótenshe jaǵdaılar mınıstriniń buıryǵy boıynsha Alǵys hattarmen marapattaldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 27 sáýirde Ábilmansur Tóleýǵalı men Mereı Máýitbekov burynǵy Ponton kópiri aýmaǵynda sýǵa qulap ketken er adamǵa kómekke umtylǵan.
Aǵynmen kele jatqan adamdy kórgen ekeýi jaǵalaý boıymen júgirdi. Sodan keıin Ábilmansur sýǵa sekirip, er adamdy alyp shyqty. Al Mereı bolsa jedel járdem qyzmetkerleri kelgenge deıin es-tússiz jatqan zardap shegýshige alǵashqy kómek kórsetýge tyrysqan.
Beıbit kúnniń batyrlaryn búgin oblystyq TJD bastyǵy, azamattyq qorǵaý polkovnıgi Erlan Nurpeıisov marapattady. Jigitter ózderiniń oryndarynda basqa bireý bolsa da solaı áreket etetindigin aıtty.
«Sol bir syn saǵatta oılanýǵa ýaqyt ta bolmady. Lezde kómek kórsetýge tyrystyq. Biraq ózen aǵysy kúshti eken. Shynymdy aıtsam, barlyǵy kınodaǵydaı boldy. Sýǵa qulaǵan kisiniń aman qalǵanyna qýanyshtymyz. Alǵashqy kómek kórsetý daǵdylaryn ómirimde birinshi ret qoldandym», - dedi Mereı.
Esterińizge sala ketsek, osyǵan deıin Semeıde sýǵa batyp bara jatqan adam qutqarylǵandyǵyn habarlaǵan bolatynbyz.
