Semeıde sýǵa batyp bara jatqan adam qutqaryldy
SEMEI. QazAqparat – Semeı qalasynyń eki turǵyny sýǵa batyp bara jatqan adamdy ajaldan arashalap qaldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 27 sáýirde burynǵy Ponton kópiri aýmaǵynda oınap júrgen balalar er adamnyń sýǵa qulap ketkenin kórip qalǵan. Olar lezde bul týraly jaqyn mańdaǵy jigitterge aıtty.
«22 jastaǵy Ábilmansur Tóleýǵalı men onyń dosy Mereı Maýtbekov oılanbastan oqıǵa ornyna jetken. Aǵynmen kele jatqan adamdy kórgen ekeýi jaǵalaý boıymen júgirdi. Sodan keıin Ábilmansur sýǵa sekirip, er adamdy alyp shyqty. Al Mereı bolsa jedel járdem qyzmetkerleri kelgenge deıin es-tússiz jatqan zardap shegýshige alǵashqy kómek kórsetýge tyrysqan», - delingen habarlamada.
Kóp uzamaı oqıǵa ornyna jetken dárigerler shahar turǵynyn medıtsınalyq mekemege jetkizdi. Qazirgi ýaqytta ol jansaqtaý bóliminde jatyr.
