Semeıde sý tasqynynan zardap shekkenderge kómek kartasy taratyldy
SEMEI. QazAqparat - «Qazaqstan Qyzyl jarty aı» qoǵamy men Bolat Ótemuratov qory tasqyn sýdan zardap shekken semeılikterge kómek kórsetýde, dep habarlaıdy QazAqparat.
Kómek kartasy aldymen úıi tolyǵymen qırap qalǵan azamattarǵa berildi. Sodan keıin ony jalǵyzbasty analar, zeınetkerler, kópbalaly az qamtylǵan otbasylar men múmkindigi shekteýli jandar aldy. Barlyǵy 81 otbasy. Taratylǵan kartanyń jalpy quny 9 mln 660000 teńge.
«Búgin 322 adam kómekke qol jetkizdi. Kómek qarjy «ForteBank» kómek kartalary arqyly berildi. Bir kartaǵa aýdarylatyn soma 30 myń teńgeni quraıdy. Bul qarjyǵa turǵyndar eń qajetti zattardyń barlyǵyn satyp alýǵa bolady»,-deıdi «Qazaqstan Qyzyl jarty aı» qoǵamynyń tótenshe jaǵdaı boıynsha úılestirýshisi Rýslan Hrýşev.
Buǵan deıin qos uıym birigip sý tasqynynan zardap shekken Aıagóz aýdanyna 17 040000 teńge qarjy bólse, Glýbokoe aýdanyna 10 410000 teńge, Shemonaıha turǵyndaryna 5 200000 teńge bólingen.
