Semeıde sý tasqynynan zardap shekkenderge 70 mln teńge bólinedi
SEMEI. QazAqparat - Búgin Semeıge ShQO ákimi Danıal Ahmetov saparmen kelip, sý astynda qalǵan úılerdiń jaǵdaıymen tanysty, dep habarlaıdy QazAqparat.
Búgin Semeıge saparmen kelgen oblys ákimi aldymen Mırnyı kentindegi Zagarodnaıa turǵyndarymen kezdesti. Qazir kentte táýlik boıy úılerden sý aıdaý jumystary júrgizilip jatyr. Kentte birneshe jyldan beri turyp jatqan Serǵazy Tólegentaev «qaýip tónip turǵannan habarsyz boldyq» dep otyr. Baspanasynyń irgetasy sógilip, qabyrǵasy qulaǵaly turǵanyn aıtqan Serǵazy qazir áıeli, eki balasymen ınternatty panalaýda.
«Úıimniń esigin qaǵyp sý kelýi múmkin dep qana aıtty. Sý kelgende qashtyq. Esigimizdi de jaýyp úlgermedik. Aǵatyn nárseniń barlyǵy aǵyp ketti. 20 jyl ishinde arnadan sý shyǵyp kórgen emes. Úıimizge kire almaı jatyrmyz. Joǵary jaqtaǵy basshylar sheshetin shyǵar. Úıimiz turýǵa jaramaı qaldy. Іshindegi dúnıesi aqty. Úıdiń irgetasy men qabyrǵalary jarylyp ketti. Qazir ınternatta turyp jatyrmyz. Máselemiz sheshiledi dep senemiz», - deıdi qala turǵyny.
Aımaq basshysy kent turǵyndaryn sabyrlyqqa shaqyryp, barlyq shyǵynnyń óteletinin jetkizdi. Bul maqsatta bıýdjetten 70 mln teńge qarjy bólinbek.
«Búgingi kúni arnaıy komıssııa jumys istep jatyr. Shyǵyn kólemin anyqtaıdy. Biz ótep beremiz. Qajetti sharalar qoldanylady», - dedi oblys ákimi.
Sondaı-aq aımaq basshysy sý tasqynynyń oryn alýyna sebepker bolǵan jandardyń jaýapqa tartylyp jatqanyn aıtty. Aıta ketsek, Ertis ózeniniń tasýyna Shúlbi GES-inde sý qorynyń normadan artyq jınalýy sebep bolǵan. ıAǵnı, sekýndyna jiberilýi tıis 500 tekshe metr sýdyń mólsherin 1 800-ge deıin arttyrǵan.
«Osy kemshilikti istegen adamdardy bilemiz. Osy máselemen prokýratýra aınalysyp jatyr. Men kún osy basshylardy shaqyryp aıtqam, baıqańdar dep. Sonda olar obektıvti aqparat bergen joq. Biraqta qazir jaǵdaı anyq boldy», - dedi Danıal Ahmetov.
Al sý QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev sýdyń jiberilip jatqany týraly aldyn ala eskertý jasaldy dep otyr.
«Eger sýdy osylaı tastamaǵanda onda biz Shúlbiden aıyrylyp qalar edik. ol kezde Semeıdi, Pavlodardy da sý basar edi. Qoımadan sý asyp ketý qaýpi tóngenen keıin májbir boldy. Muz keptelisine baılanysty jaǵaǵa shyqty. Eger jarystar jasalmaı sý muzdyń ústimen ketkende jaǵdaı óte qıyn bolar edi. Qaýip týraly 25 naýryz kúni eskertilgen. Olardyń da kinási emes endi mynandaı sý kezinde qıynshylyqtar bolady», - dedi Islam Ábishev.
Aımaq basshysy sonymen qatar josparsyz júrgizilgen muzdy jarý jumystary úshin turǵyndardan keshirim surady. Sebebi, sý tasqyny qaýip tóndirgen soń Eristegi keptelip qalǵan seńdi jarý jumystary júrgizildi. Saldarynan ózen mańynda ornalasqan 80 páter terezelerinen aıyryldy.
Aldaǵy ýaqytta sý tasqynyń aldyn alý úshin ózen jaǵasyn bekitý jumystary júrgiziledi. Qazir jobalyq-smetalyq qujattary daıyndalyp jatyr. Sonda ózen kóterilgen ýaqyta Túıemoınaq araly aýdany, Prıstan, Bobrovka, Mırnyı kentterine tóner qaýip seıiledi.
Sonymen qatar oblys ákimi jergilikti bılikke úılerine oralǵan turǵyndardy tegin otyn, azyq-túlik, kıim keshekpen qamtamasyz etýdi tapsyrdy.
Bastapqy boljam boıynsha Shyǵys Qazaqstan oblysyna sý tasqyny saldarynan kelgen shyǵyn kólemi 2 mlrd 205 mln teńgeni quraǵan. Biraq Semeı qalasy men Zyrıan aýdanynyń shyǵyn kólemi kirmegen.
Eske sala ketsek, 28 naýryz kúni Ertistegi sý deńgeıi kúrt kóterilip, qalanyń sol jaǵalaýyndaǵy Bobrovka saıajaıy men oń jaǵalaýdaǵy Zaton, Mırnyı kentterindegi Lodochnaıa, Kraevaıa, Zagarodnaıa kósheleri sý astynda qalǵan bolatyn.
Al turǵyndar jappaı qaýipsiz jerge kóshirilip, qalada tótenshe jaǵdaı jarııalandy.
