Semeıde sý tasqynynan zardap shekkenderge 371 mln teńge bólindi
SEMEI. QazAqparat - Semeıde sý tasqynynan zardap shekken úılerdi jóndeýge 371 mln teńge, al jańa baspanalar satyp alý úshin 58 mln teńge bólindi. Biraq úı ıeleri ákimdik usynǵan sharttarǵa kelispeı otyr. Sebebi, aqshany ózderi alyp, jóndeý júrgizsek deıdi, dep habarlaıdy QazAqparat.
Qala ákimi Ermak Sálimov sý basqan aýdandardyń turǵyndarymen kezdesti. Aldymen Mırnyı kentine baryp, qaıta qalpyna keltirý jumystary júrip jatqan 2 úıdiń qurylysymen tanysty. Jóndeý jumystarymen «VostokStroıGrýpp» JShS aınalysýda. Turýǵa jaramsyz bolǵan baspananyń birine 2 mln 237 myń teńge bólinse, ekinshi úı 700 myń teńgege baǵalanǵan. Merdiger mekemeniń jumysyn komıssııamen birge úı ıeleri de baqylaýda. Ázirge atqarylyp jatqan jumystar kóńilderinen shyǵatynyn jetkizdi.
Sý tasqynynan zardap shekken úılerdi jóndeý úshin respýblıkalyq bıýdjetten 371 mln teńge, al jańa baspanalar satyp alý úshin 58 mln teńge bólindi. Biraq qarajat úı ıelerine emes, jóndeý jumystarymen aınalysatyn merdiger mekeme beriledi. Al buǵan turǵyndardyń keıbiri kelispeı otyr. Sebebin jaýapty mekeme jumysty sapasyz jasaıtynymen túsindirdi. Sondyqtan qala ákimi jóndeý jumystaryn júrgizetin mekemeni turǵyndar ózderi usyna alatynyn jetkizdi.
«Turǵyndar aqshany óz qoldaryna alǵysy keledi. Biraq bul zań boıynsha múmkin emes. Biz o basta eskertkenbiz. Taǵy qaıtalaımyn, tezirek jóndeý jumystarymen aınalysatyn merdigerdi taýyp, kelisimshart jasasyp, jóndeýdi bastańyzdar. Keıbir úı ıeleriniń kelisimsharttary durys emes. Taǵy birinde tehnıkalyq qujaty joq. Barlyǵyn retke keltirý kerek. Mırnyı kentinde sý basqan 50 úıdiń tek ekeýinde ǵana jóndeý júrip jatyr. Taǵy 6 úıdiń ıesi merdiger tapty. Al qalǵan turǵyndar qalaı tıimdi, ne isteý kerek dep oılanyp júr», - dedi qala basshysy.
Aıta keteıik, sý tasqynan qalada 204 baspana búlindi. Onyń 110-y Bobrovka saıajaıynda. Qala ákiminiń sózinshe saıajaıdaǵy úılerdi qalypqa keltirý jumystary da aıaqtalýǵa jaqyn.
