Semeıde sý tasqynynan zardap shekkender ótemaqy almaıdy
SEMEI. QazAqparat - Semeıde sý tasqynynan zardap shekken turǵyndar memleket tarapynan beriletin ótemaqyny almaıtyn boldy. Bólingen qarajat jóndeý jumystarymen aınalysatyn merdiger mekemelerge beriledi, dep habarlaıdy QazAqparat.
Qaladaǵy Mırnyı, Zaton, Prıstan, Túıemoınaq araly aýdany men Bobrovka saıajaıyndaǵy 287 úıdi sý basqan bolatyn. Zardap shekken turǵyndardyń kóbi baspanalaryna oralmaǵan. Áli kúnge deıin týǵan-týystary men qonaqúılerdi panalap júr. Sebebi, sý astynda qalǵan úıleriniń ishi keppegen.
Arnaıy qurylǵan komıssııa sý alǵan úılerdiń shyǵynyn eseptep, jobalyq-smetalyq qujattaryn ázirlegen. Biraq turǵyndar memleket tarapynan bólinetin ótemaqyny qoldaryna almaıtyn boldy. Barlyq qarajat jóndeý jumystarymen aınalysatyn merdiger mekemelerge beriledi. Semeı qalalyq turǵyn úı kommýnaldyq sharýashylyǵy bólimi basshysynyń orynbasary Amantaı Ýtelbaevtyń sózinshe, bul áreket turǵyndardyń qamy úshin jasalyp otyr.
"Úılerdi jóndeý jumystaryn qurylys mekemeleri arnaıy smetalyq jobaǵa sáıkes júrgizedi. Eger ótemaqy turǵyndardyń qolyna berilse, olar jumysshylarǵa, qurylys materıaldaryna aqsha únemdep, keıin jasalǵan jóndeý jumystary sapasyz bolyp jatsa, arada máseleler týyndaýy múmkin. Al jóndeý júrgizgen qurylys kompanııasy keleńsiz jaıttar oryn alsa jaýap beredi. Jumys sapasyn arnaıy komıssııa jáne úı ıeleriniń ózderi qadaǵalaıdy. Ótemaqy bólingen kezde biz barlyq turǵyndarmen jeke sóılesemiz. Sebebi, árkimge kelgen shyǵyn kólemi ártúrli», - dedi Amantaı Ýtelbaev.
Aıta ketsek, baspanalary sý astynda qalǵan Bobrovka saıajaıynyń turǵyndary úshin de memleket tarapynan ótemaqy berilmeıdi. Sebebi, saıajaı úıleri qalypqa keltirilýi tıis nysandar tizimine enbeıdi. Biraq saıajaı úılerin jóndeý úshin bıýdjetten tys qarajat bólindi.
