Semeıde sý tasqynynan zardap shekken keı otbasylar ótemaqysyz qalýy múmkin
SEMEI. QazAqparat - Semeıde baspanasyn sý basqan turǵyndardyń birazy ótemaqy almaýy múmkin. Bul týraly Semeı qalasynyń ákimi Ermak Sálimov turǵyndarmen kezdesý barysynda aıtty. Sebebi, olar áli kúnge deıin qajetti qujattardy jınap, ótkizbegen, dep habarlaıdy QazAqparat.
Sý tasqynynan búlingen Prıstan, Mırnyı kentterindegi úıler respýblıkalyq bıýdjet esebinen qalpyna keltirilip jatyr. Biraq keı turǵyndar áli kúnge deıin jóndeý jumystaryn júrgizý úshin qajetti qujattardy ótkizbegen. Turǵyndarmen kezdesken qala ákimi Ermak Sálimov olardyń ótemaqysyz qalatynyn eskertti. Al turǵyndar bolsa qujattardy rásimdeýge aqshasynyń joqtyǵyn, taǵy biri qujat jınaý kerektiginen bilmegenin aıtyp túsindirýde.
«Sizderdiń aralaryńyzda úıin jóndeý úshin ótemaqy almaıtyn otbasylar bar. Nemese úıdi qalpyna keltirý kezinde úlken máseleler týyndaýy múmkin. Ol kezde biz sizderge múldem kómektese almaımyz. Sizder «áli ýaqytymyz bar, úıimizdi jóndep beredi» dep oılap júrgen shyǵarsyzdar. Biraq ýaqytyly qajetti qujattardy daıyndaýǵa tıissizder. Qujattardy jınaý kerek ekenin sáýirden bastap aıtyp kelemiz», - dedi qala ákimi.
Belgilengen algorıtm boıynsha respýblıkalyq bıýdjetten bólingen qarajatqa úılerdi qalpyna keltirý jumystaryn zańdy tulǵalar ǵana júrgize alady. ıAǵnı sý tasqynynan zardap shekkenderge tólenetin ótemaqy qolyna berilmeıdi. Biraq keı turǵyndar áli kúnge deıin ótemaqyny ózderine berýdi talap etýde. Aıtýlarynsha qajetti jóndeýdi ózderi júrgizedi.
«Keı turǵyndar úıdiń tehnıkalyq qujatyn kútip otyrmyz deıdi. Biraq bul qujat 2 saǵattyń ishinde daıyn bolady. Taǵy bireýleri 5 jyl boıy úıdi óz atyna rásimdemegenin aıtady. Bul turǵyndardyń ótemaqyny qolyna alý úshin aıtyp otyrǵan syltaýy dep túsinemin. Biraq ótemaqy qolǵa berilmeıdi. Barlyq jóndeý jumystaryn belgilengen merdiger mekeme jasaıdy. Qarajat solarǵa tólenedi»,-dedi Ermak Sálimov.
Sý tasqynynan Prıstan jáne Mırnyı kentterinde barlyǵy 204 úı búlindi. Búgingi kúni 100-den asa úı jóndelip, turǵyndar baspanalaryna oralǵan. Jóndeý jumystarymen aınalysyp jatqan merdiger mekemeler maýsym aıynda bólingen qarajattyń 100 mln teńgesin ıgergen. Taǵy 100 mln teńge shilde aıynda, 57 mln teńge tamyz aıynda jumsalady dep josparlanýda. Al 1 qyrkúıekke deıin bólingen barlyq qarajat ıgerilýi tıis. Sodan keıin atqarylǵan jumystardyń aktisi Astanaǵa jiberiledi. Keıin arnaıy qurylǵan komıssııa júrgizilgen jóndeý jumystarynyń sapasyn baǵalaıtyn bolady.
