Semeıde sý shaıyp ketken kópir qalpyna keltirilýde
ASTANA. QazAqparat - Semeıde tasqyndy sý buzyp ketken kópirdi jóndeý jumystary júrgizilýde.
Sýyqbastaý kentine baratyn joldaǵy ótkel keshe tasqynǵa tótep bere almaı, eleýli zardap shekti. Osy ýaqytta Qurtoǵan ózeniniń deńgeıi birshama tómendedi. Qazir bul jerge 7 tehnıka men 15 adam jumyldyrylǵan. Bılik ókilderi qaýip seıilmegendikten kúndiz-túni baqylaý úzilmeıtinin aıtady.
«Qyzyl sý kópirdiń sol jaǵyn shaıyp ketti. Búgin ózenniń ekpini áli joǵary ekenin kórip otyrmyz. Qazir turǵyndar Sýyqbastaý kentine Jolaman aýylynan túsip qalyp, kópirden jaıaý ótedi de, odan ári basqa avtobýstarǵa otyryp qatynaýǵa májbúr. Munyń bári halyqtyń qaýipsizdigi úshin», - deıdi Semeı qalasy ákiminiń orynbasary Nıkolaı Ýshakov.
Derekkóz: "Habar 24" arnasy.
