Semeıde sý basqan úılerdi komıssııa tekserip jatyr
SEMEI. QazAqparat - Semeıde arnaıy qurylǵan komıssııa sý tasqynynan zardap shekken úılerdiń shyǵynyn esepteýdi bastady, dep habarlaıdy QazAqparat.
Qazir qalalyq ákimdik janynan qurylǵan komıssııa músheleri qaraýyna túsken aryz-shaǵym boıynsha úılerdi aralap, baǵalaýda. Tabıǵat apaty saldarynan zardap shekken úıler birneshe ret tekserýden ótedi. Arnaıy komıssııa óz jumysyn qorytyndylaǵan soń árbir turǵynnyń úıine qatysty málimetter jan-jaqty tekseriledi. Sodan soń mamandar saraptamasynyń nátıjesi boıynsha shyǵyn kólemin anyqtap, ótemaqy taǵaıyndaıdy. Quramynda 40 maman bar komıssııa múshesi ázirge tizim boıynsha tekserý júrgizýde. Bul jumystar kelesi aptada aıaqtalmaq.
«Biz tek úıdiń jaǵdaıyn baǵalaımyz. Al shyǵyndy komıssııa esepteıdi. Turǵyndar aryz jazǵan ýaqytta baspanasy jaıly tolyq aqparat jazady. Sol boıynsha biz jumystar júrgizemiz. Mamandar tizim boıynsha barlyq turǵynnyń úıine baryp, tekserý júrgizedi. Ázirge naqty aqparat aıta almaımyz. Baǵalaý jumystary aıaqtalǵan joq»,-dedi baǵalaý komıssııanyń ókili Aqmaral Muratova.
Sonymen qatar mamandar úıdegi turmystyq tehnıkalardyń da shyǵyny óteledi dep otyr. Biraq tehnıkanyń kepildik merzimi ótpegen jáne taýardyń túbirtegi saqtalǵan bolýy kerek.
