Semeıde stýdentter arasynda jemqorlyqtyń aldyn alý úshin aktsııa ótti

SEMEI. QazAqparat – Semeı qalasynda stýdentter arasynda jemqorlyqtyń aldyn alý úshin «Taza sessııa» aktsııasy ótti, dep habarlaıdy QazAqparat tilshisi.

Amanat partııasy janyndaǵy Jas Otan jastar qanaty Shyǵys Qazaqstan oblystyq fılıalynyń uıymdastyrýymen Semeıde «Taza sessııa» aktsııasy ótti.

Aktsııa alǵash bolyp medıtsına ýnıversıtetinen bastaldy.

Mundaǵy maqsat – stýdentter arasynda sybaılas jemqorlyqqa qarsy mádenıetti qalyptastyrý, joǵary oqý ornyndaǵy jemqorlyq faktilerin anyqtaý. Sharaǵa Semeı – Adaldyq alańy jobalyq keńsesiniń jetekshisi, qalalyq máslıhat depýttary jáne jastardy qoldaý keńesiniń músheleri qatysty.

«Aktsııa aıasynda jastardan anonımdi túrde saýalnamalar alynýda. Sondaı-aq stýdentterge túsindirý jumystary júrgizilip jatyr. Jyl kóleminde eki ret uıymdastyrylatyn bul shara jastardyń boıynda adaldyqty, jaýapkershilik pen adamgershilikti qalyptasyratyny anyq», - dedi fılıal tóraǵasy Almas Aıtmuqash.

Aıta keteıik, aldaǵy ýaqytta «Taza sessııa» aktsııasy óńirdiń basqa da ýnıversıtetterinde jalǵasady.