Semeıdegi strategııalyq mańyzy bar kópirdi rekonstrýktsııalaý: 9 tirektiń 8-i salynyp boldy
ASTANA. KAZINFORM – Kólik mınıstrligi Avtomobıl joldary komıteti tóraǵasynyń orynbasary Anar Ǵabdýllına Semeı qalasyndaǵy avtogýj kópirin rekonstrýktsııalaý jumystarynyń barysyn tekserdi.
Sapar barysynda jobany iske asyrý qarqyny, qurylys jumystarynyń sapasy jáne qurylys kestesiniń saqtalýy qarastyryldy.
— Kópirdi rekonstrýktsııalaý 2022–2026 jyldar aralyǵynda júzege asyrylady. Nysannyń jalpy uzyndyǵy 1 350 metr, onyń ishinde 540 metri — avtojol ótkelderi, 810 metri — kópirdiń aralyq qurylymy. Kópirdiń eni 23 metr. Joba boıynsha 9 tirek turǵyzý kózdelgen.
Búgingi kúni 9 tirektiń 8-i turǵyzyldy. Nysanǵa jalpy kólemi 9 myń tonna metall konstrýktsııalar jetkizildi, olardyń 4,7 myń tonnasy ornatyldy, — delingen habarlamada.
Anar Ǵabdýllına jobany belgilengen merzimde aıaqtaýdyń mańyzdylyǵyn atap ótip, qurylys sapasy men jumys kestesiniń saqtalýyn turaqty baqylaýda ustaýdy tapsyrdy.
Joba Abaı oblysynyń turǵyndary úshin mańyzdy ınfraqurylymdyq nysan. Rekonstrýktsııa aıaqtalǵannan keıin kópir Semeı qalasynyń jaǵalaýlary arasyndaǵy kólik qatynasyn anaǵurlym yńǵaıly ári qaýipsiz etip, ótkizý qabiletin arttyrady jáne qalalyq ınfraqurylymnyń damýyna qosymsha múmkindik beredi.
Qazirgi ýaqytta qurylys jumystary josparǵa sáıkes jalǵasyp jatyr.
Aıta ketelik Semeı qalasynyń turǵyndary ortalyqtaǵy kópir qurylysynyń tym sozbalańǵa salynyp ketkenine burynnan beri shaǵymdanyp keletini týraly jazǵan edik.
