Semeıde sirińkemen oınaǵan 6 jasar bala kólikti órtep jiberdi
SEMEI. KAZINFORM — Semeı qalasynda sirińkemen oınaǵan balanyń ata-anasy kóligi órtengen jábirlenýshige keltirilgen materıaldyq shyǵyndy óteýge mindettelmek.
Oblystyq polıtsııa departamenti baspasóz qyzmetiniń málimetine súıensek, polıtsııa qyzmetkerleri 352-kvartal kóshesindegi turǵyn úıdiń aýlasynda bolǵan avtokóliktiń otqa oraný sebebin anyqtady.
— Tekserý barysynda tártip saqshylary oqıǵa ornyna jaqyn ornalasqan beınebaqylaý kameralarynyń jazbalaryn zerttedi. Nátıjesinde órt shyqpas buryn kóliktiń janynda úsh kámeletke tolmaǵan balanyń bolǵany anyqtaldy. Aldyn ala málimet boıynsha, 6 jasar bala sirińke jaǵyp oınap, kóliktiń janyndaǵy qurǵaq shópti tutatqan. Jalyn tarala bastaǵanda balalar qorqyp, oqıǵa ornynan qashyp ketken. Bul jaıt kámeletke tolmaǵandardyń zańdy ókilderinen alynǵan túsiniktemeler barysynda da rastaldy, — delingen aqparatta.
Endi balanyń ata-anasy avtokólik ıesine keltirilgen materıaldyq shyǵyndy óteýge mindetteledi.
Eske salsaq, osyǵan deıin Qazaqstanda bıyl 536 orman órti tirkelgeni habarlanǵan.
