Semeıde sporttyq-mádenı keshen ashylady
SEMEI. QazAqparat – Shyǵys Qazaqstan oblysynyń ákimi Danıal Ahmetov Semeıde taıaý ýaqytta ashylatyn sporttyq-mádenı keshendi aralap shyqty, dep habarlaıdy QazAqparat tilshisi.
«Keshen qurylysynyń 99% aıaqtalǵan, biraq 1% qalyp otyr. Aldymen ashyp alyp, keıin jaýyp tastaýdy qalamaımyz. Sondyqtan, barlyǵy daıyn bolǵan ýaqytta ǵana ashylý kúni ótedi. Keshende úıirme qyzmeti iske qosylmaq, sporttyq qurylymdar bar. Munyń bári jumys isteıtin bolady», - dep atap ótti oblys ákimi D.Ahmetov.
Oblys basshysy Qaraǵaıly jańa shaǵyn aýdanynda boı kótergen keshendi aralap, qurylys sapasyna kóńili tolatynyn aıtty. 5 myń orynǵa arnalǵan sport nysanyn az ýaqyttyń ishinde jergilikti qurylys kompanııasy salǵan.
«Bul keshenniń zamanaýı talaptarǵa saı keletin keremet qurylym ekenin kórip otyrmyz. Eń bastysy – sport kesheni Semeı men oblys turǵyndaryna qyzmet kórsetpek. Munda Qazaqstan men Eýropa chempıonatyn ǵana emes, álemdik dodalar ótkizýge bolady», - dedi D.Ahmetov.
Avtory Oral Erlanuly
