Semeıde sport akademııasy ashyldy

ÓSKEMEN. QazAqparat - Olımpıada chempıony Olga Rypakova búgin ShQO ákimi Danıal Ahmetovpen jáne Semeı jurtshylyǵymen birge Sport akademııasyn ashty. Rásim Qazaqstan Táýelsizdiginiń 25 jyldyǵyna arnaldy, dep habarlady óńirdiń aqparattyq ortalyǵyna silteme jasap «QazAqparat» HAA tilshisi.

Belgili bolǵandaı, Sport akademııasynyń quramyna balalar-jasóspirimder sport mektebi men 200 oryndyq ınternatpen jekpe-jek zaly kiredi. Internat qurylysy 2015 jyly kúzde bastaldy.

Nysandar Semeı qalasyndaǵy  №1 BJSM janynda boı kóterdi. Qurylys aıaqtalǵannan keıin barlyq úsh nysandy biriktirip, Sport akademııasyn qurý sheshimi qabyldandy.

«Biz keremet elde turyp jatyrmyz. Oblystyń eń  daryndy balalary jınalǵany úshin qýanyshtymyn. 200 úzdik sportshy. Bul mekemeni «Semeı sport akademııasy» dep ataýdy sheshtik», - dep atap ótti rásimde Danıal Ahmetov.

Táýelsizdik qarsańynda ashylǵan mańyzdy sport kesheniniń ashylýymen Semeı turǵyndaryn Olımpıada chempıony Olga Rypakova quttyqtady. «Sportty jaqsy kóretin balalar súıikti isimen aınalysatyn keremet oryn ashyp jatyrmyz. Shalǵaı aýdandardaǵy jas sportshylarda da osyndaı múmkindik bolǵany óte mańyzdy. Táýelsizdiktiń 25 jyldyǵymen quttyqtaımyn. Bir jetistikpen toqtap qalýǵa bolmaıdy, únemi jetilip, alǵa umtyla berińder», - dedi balalarǵa Olga Rypakova.

Akademııa jumysy ShQO kelesheginen úmit kútetin sportshylaryn iriktep olardy jekpe-jektiń tórt túri (dzıýdo, sambo, grek-rım kúresi, erkin kúres) boıynsha daıyndaýǵa baǵyttalǵan.

Balalarmen oqý-jattyǵý jumysyn ótkizý úshin Mońǵolııadan, Reseıden, Ázerbaıjannan joǵary sanatty shetel mamandary tartyldy.  Oblys kóleminde 10-18 jas aralyǵyndaǵy  oqýshylardy jınaý  jyl saıyn   qyrkúıek aınyda júrgiziledi.