Semeıde sózdi kerisinshe aıtatyn 8 jasar qyz bala turady
SEMEI. QazAqparat - Semeıde sózderdi kerisinshe aıtatyn erekshe qyz turady. 8 jasar Adelııa Abylqasymova kez kelgen sózdi, sóılemdi sol sátte kerisinshe aıtyp bere alatyn qabiletke ıe, dep habarlaıdy QazAqparat.
Adelııa Semeıdegi №28 mekteptiń oqýshysy. 3-synypqa aıaq basatyn onyń boıyndaǵy erekshe qabilet kópshilikti tańǵaldyrady. Sebebi, ol kez kelgen sózdi, bútin bir sóılemdi múdirmesten sol mezette keri aıtyp bere alady. Bastapqyda oqýshynyń boıyndaǵy erekshe qabiletke ustazdary men synyptastary, dostary kúdikpen qaraǵan. Keıin túrli sózder men sóılemderdi aıtyp synaǵannan keıin kózderi jetken eken.
Bul qasıet onyń boıynda bala kezinen bar. Anasy Altynaıdyń sózinshe, qyzynyń boıyndaǵy aıryqsha daryndy bilse de, esh áreket jasamaǵan. Biraq sońǵy bir jylda jetildirý maqsatynda kúndelikti túrli jattyǵýlar jasaýdy qolǵa alypty.
«Kez kelgen adam sózderdi kerisinshe birden aıtyp bere almaıdy. Bastapqyda bizdiń aıtqan sózderdi, keıin qysqa sóılemderimizdi kerisinshe aıtyp júrdi. Biraq bul áreketin oıynǵa sanap, asa mán bermedik. Keıinnen sózimizdi kerisinshe durys aıtatynyn baıqadyq. Qazir kúndelikti ońaı sóz, sóılemnen bastap kúrdeli sóılemderge deıin aıtyp, jetildirý maqsatynda túrli jattyǵýlar jasaımyz», - deıdi anasy.
Adelııa bos ýaqytynda sýret salǵandy, qyzyqty kitap oqyǵandy unatady. Óziniń boıyndaǵy erekshe qasıetti jetildirip, boıjetkende Qazaqstandaǵy Gınnesstiń rekordtar kitabyna engisi keletin armany baryn jetkizdi. Al «Bolashaqta kim bolǵyń keledi?» degen suraǵymyzǵa ol: «Adam anatomııasyn zertteıtin ǵalym bolǵym keledi», - dep jaýap berdi.
«Maǵan barlyq pánder unaıdy. Birinshi synaptan bastap úzdik oqýshymyn. Al óskende adam anatomııasyn zertteıtin ǵalym bolǵym keledi. Osy sala maǵan óte qyzyqty. Jáne anammen, apaıymmen kúndelikti jattyǵý jasaımyz. Olar maǵan sózder, sóılemder aıtady. Men kerisinshe aıtyp beremin. Keı kezde uzaq kúrdeli sóılemderdi kóz aldyma elestetip alyp aıtamyn. Sondyqtan qazir múdirmesten aıtýǵa úırenip júrmin», - deıdi Adelııa.
Kishkentaıynan alǵyr qyz terisinen oqý esh qıyndyq týdyrmaıtynyn aıtady. Qazir tipti kópshiligi qyzyǵýshylyq tanytyp, sózderin kerisinshe aıtyp berýdi usynatyn kórinedi. Eshkimniń sózin tastamaıtyn qyz terisinen oqýdan óziniń de kóńili kóterilip qalatyn aıtady.
