Semeıde sot burynǵy qyzmetkerdiń paıdasyna JShS-den 400 myń teńge ótemaqy óndirdi
ASTANA. QazAqparat - Semeı qalalyq soty densaýlyqqa keltirilgen zııandy óteý jáne eńbekaqyny óndirý týraly azamattyq isti qarady.
Talapker óziniń talap aryzynda «Semeıplastkom» JShS-de 2013 jyldyń 4 shildesinde sylaý-syrlaýshy mindetin atqaryp júrgen kezinde 2,5 metr bıiktikten qulap, óndiristik jaraqat alǵanyn, sonyń saldarynan súıekteri synyp, densaýlyǵyna zaqym kelgenin atap kórsetken. Buǵan qosa, 2015 jyldyń qarasha aıynan búgingi kúnge deıin óndiristiń bos turýyna baılanysty eńbekaqy almaǵanyn aıtqan.
Sot otyrysynyń barysynda jazataıym oqıǵaǵa qatysty qurylǵan aktige sáıkes, jumys berýshiniń kinásiniń dárejesi 100 paıyzǵa belgilengeni anyqtalǵan. Eńbekke qabilettilikten aıyrylý dárejesi 2016 jyldyń 13 sáýirine deıin 29 paıyzdy, qaıtalap tekserilgen kezde 15 paıyzdy quraǵan. Saqtandyrý kompanııasy birjolǵy ótemaqyny, oǵan qosa mamyr aıyna deıingi tabysynyń esebine saqtandyrý tólemderin tólep kelgen.
Eńbek kodeksiniń 122-babynyń 3-tarmaǵyna sáıkes jumyskerge kásiptik eńbekke qabilettiliginen aıyrylýdyń besten jıyrma toǵyzǵa deıingi paıyzy qosa alǵandaǵy dárejesin belgileýmen baılanysty zııan keltirilgen kezde, jumys berýshi jumyskerge joǵaltylǵan tabysyn jáne densaýlyǵynyń zaqymdanýynan týyndaǵan shyǵyndardy óteýge mindetti.
Sottyń sheshimimen talap aryz ishinara qanaǵattandyryldy. Sheshim boıynsha JShS-den bos turyp qalǵany úshin 429 393 teńge eńbekaqy boıynsha qaryz somasy, 50 myń teńge mólsherinde moraldyq zııan ótemaqysy óndirildi jáne jaýapker talapkerdiń paıdasyna aı saıyn densaýlyqqa keltirilgen zııandy óteý úshin joǵaltylǵan ortasha aılyq eńbekaqy mólsheriniń 15 paıyzyn tóleýge mindetteldi.
Sot sheshimi zańdy kúshine engen joq.
