Semeıde soqqyǵa jyǵylǵan oqýshynyń otbasyna baspana alyp beredi

SEMEI. KAZINFORM – Abaı oblysynyń bala quqyqtary jónindegi óńirlik ýákili Elzıra Soltabaeva otbasyǵa kórsetilip jatqan qoldaý sharalary jóninde aqparat berdi.

Onyń aıtýynsha kópshiliktiń qoldaýymen jınalǵan qarajat baspana satyp alýǵa jumsalady.

- Tolyq medıtsınalyq tekserýden ótken balaǵa qajet psıhologııalyq kómek kórsetilip, otbasyǵa quqyqtyq qoldaý uıymdastyryldy. Qazirgi tańda otbasynyń jaqyn týysynyń esepshotyna 24 mıllıon teńge jınaldy. Bul qarajat baspana satyp alýǵa baǵyttalady, - dedi ol. 

Ýákildiń málimetinshe qarjynyń ádil ári ashyq jumsalýyn baqylaý úshin oblystyq jáne qalalyq máslıhat depýtattary, advokattar men qoǵamdyq uıym ókilderi kiretin arnaıy komıssııa qurylyp jatyr.

- Kómek kórsetý protsesi ashyqtyq pen ádildik qaǵıdalaryna negizdeledi. Qoǵamnyń úlken qoldaýyn eskere otyryp, turǵyn úıdi tańdaý jáne satyp alý barysy ashyq ótedi, – dep atap ótti Elzıra Soltabaeva.

Sonymen qatar ol otbasynyń el turǵyndaryna bildirgen shynaıy rızashylyǵyn jetkizdi.

Eske salsaq, Semeıde jasóspirimder altynshy synyp oqýshysyn soqqyǵa jyqqany habarlanǵan.

Sondaı-aq 6-synyp oqýshysy soqqyǵa jyǵylǵan mektep dırektory jumystan shyǵarylyp, oqýshyny soqqyǵa jyqqan 3 jetkinshektiń áke-sheshesi ata-analyq quqyǵynan aıyrylǵany habarlanǵan.