Semeıde soqqyǵa jyǵylǵan oqýshynyń qazirgi jaǵdaıy qandaı

ASTANA. KAZINFORM — Bilikti mamandar jasóspirimniń psıhologııalyq jaǵdaıyn qalpyna keltirý úshin jumys júrgizip jatyr, dep habarlaıdy Abaı oblystyq polıtsııa departamenti.

Vedomstvo málimetinshe, Abaı oblysynda jasóspirimder arasyndaǵy janjal erekshe baqylaýǵa alyndy. Qazir jábirlenýshige jan-jaqty kómek kórsetilýde.

— Qazirgi ýaqytta jábirlenýshi jasóspirimge erekshe nazar aýdarylýda — ol arnaıy ortalyqta mamandardyń baqylaýynda. Psıhologtar men bala quqyqtary jónindegi ýákil oǵan qajetti qoldaý kórsetip, oqıǵadan keıingi emotsıonaldyq áserlerdi jeńýge kómektesýde. Bilikti mamandar jasóspirimniń psıhologııalyq jaǵdaıyn qalpyna keltirý úshin jumys júrgizip jatyr. Oqıǵaǵa qatysy bar jasóspirimderge qatysty tıisti sharalar qabyldanatyn bolady. Erteń kámeletke tolmaǵandardyń quqyqtaryn qorǵaý jónindegi oblystyq komıssııanyń otyrysy ótedi, onda árbir qatysýshynyń áreketi jeke qaralyp, qajetti sheshimder qabyldanady, — delingen oblystyq PD taratqan aqparatta.

Aıta keteıik, budan buryn Semeıde jasóspirimder altynshy synyp oqýshysyn soqqyǵa jyqqany anyqtaldy. Oqys oqıǵaǵa baılanysty qylmystyq is qozǵaldy.