Semeıde soqqyǵa jyǵylǵan balaǵa qazaqstandyqtar páter alyp berdi

SEMEI. KAZINFORM — Semeı qalasynda birneshe jetkinshek jabylyp sabaǵan 6-synyp oqýshysyna Qazaqstan halqy aqsha jınastyryp, páter alyp berdi.

Semeılik bloger jáne volonter Dınara Sadyrbaeva zardap shekken balaǵa kómek kórsetý úshin jeli qoldanýshylaryna onyń ápkesiniń bank kartasyna qarajat jınaýdy usyndy. 

— Nebári úsh kúnniń ishinde qazaqstandyqtar 35 mıllıon teńge jınady. Osylaısha, bul aqshaǵa balaǵa qala ortalyǵynan tórt bólmeli páter satyp alyndy. Buǵan deıin olar otbasymen, naqty aıtqanda ákesi, ájesi jáne taǵy tórt aǵa-ápkesimen jaldamaly páterde turǵan. Turǵyn úı Álınurdyń óz atyna rásimdelgen, — deıdi Dınara Sadyrbaeva.

Óz sózinde ol qolushyn sozǵan jandarǵa alǵys aıtyp, aqsha jınaýdy toqtatýdy surady. Sebebi qajetti soma jınalyp, turǵyn úı satyp alynyp qoıdy.

Eske salsaq, buǵan deıin Semeıde jasóspirimder altynshy synyp oqýshysyn soqqyǵa jyqqany habarlanǵan. 

Zardap shekken bala endi bokspen aınalysady.