Semeıde skýter mingen jigit áıel adamdy qaǵyp ketti
SEMEI. QazAqparat - Semeıde skýter (moped) baǵdarshamnyń qyzyl túsine ótip, jaıaý júrginshini qaǵyp ketti, dep habarlaıdy QazAqparat.
Oqys oqıǵa Qarjaýbaıuly kóshesinde oryn aldy. Baǵdarshamnyń qyzyl túsi janǵanyna qarmastan skýter júrgizýshisi ótip ketpek bolǵan. Alaıda jaıaý júrginshiler jolaǵynda kele jatqan 40 jastaǵy áıel adamdy qaǵyp ketti. Oqıǵadan soń kináli qashyp ketpekshi bolǵan. Biraq sol jerdegi kólik júrgizýshileri jol bermegen. Oqıǵanyń vıdeosy Instagramda jarııalandy.
Keıin zardap shegýshi áıel aýrýhanaǵa jetkizildi. Al júrgizýshiniń ústinen ákimshilik hattama toltyrylyp, is qozǵaldy.
«Racer markaly skýterdi tizgindegen S. esimdi júrgizýshiniń ústinen QR Ákimshilik quqyq buzýshylyq týraly kodeksiniń 610-baby boıynsha is qozǵaldy. Hattama toltyrylyp, qajetti saraptamalar taǵaıyndaldy», - dep málim etti Semeı qalalyq ІІB-niń baspasóz qyzmeti.
Vıdeodan alynǵan skrınshot
