Semeıdegi muǵalimniń jaraqat alýy: Qala ákiminiń orynbasaryna sógis jarııalandy

SEMEI. KAZINFORM – Semeıde shyrsha bezendirý kezinde muǵalimniń jaraqat alýyna baılanysty qala ákiminiń orynbasary Araıbek Hamzaevqa sógis jarııalandy.

Bul týraly Kazinform tilshisiniń saýaldaryna telefon arqyly jaýap bergen Semeı qalasy ákimi apparatynyń basshysy Nurjan Esenjolov aıtyp berdi. 

— Jańa shyrsha satyp alýǵa 25 mln teńge bólingen. Bul somada shyrshany ornatý shyǵyndary qarastyrylmaǵan. Sondyqtan TÚKSh bólimi kómek retinde eriktilerdi tartqan. Alaıda olardyń bıiktikte jumys isteýine jol berilmeý kerek edi, — dedi ol. 

Nurjan Esenjolovtyń aıtýynsha, quzyrly organdar jan-jaqty tergeý júrgizip jatyr. Bundaı jaǵdaıǵa qalaı jol berilgeni sonyń qorytyndysy boıynsha belgili bolmaq. 

— Bilim bólimi bizge emes, oblystyq bilim basqarmasynyń qaramaǵynda. Búgin sol bilim bóliminiń basshysy jumystan shyǵarylypty. Biz de shara qabyldadyq. Atap aıtqanda, bilim salasyna jaýapty qala ákiminiń orynbasary Araıbek Hamzaevqa sógis jarııalandy. Aýrýhanada jatqan muǵalim tolyq emdelip ketkenshe baqylaýymyzda bolady. Qazir ol palataǵa aýystyryldy. Jaǵdaıy turaqty, — dedi qala ákimi apparatynyń basshysy.

Eske salsaq, osyǵan deıin semeılik muǵalim shyrsha bezendirý kezinde jaraqat alǵany habarlanǵan. 

Sondaı-aq bilim bóliminiń basshysy Birjan Bulabaev qyzmetinen bosatylǵan.