Semeıde shyrsha bezendirip jatyp jaraqat alǵan muǵalim isi boıynsha ınspektsııa tekserýdi aıaqtady

SEMEI. KAZINFORM – Semeı qalasynda shyrsha bezendirip jatyp jaraqat alǵan muǵalim Qýat Aıtqalıev isi boıynsha eńbek ınspektsııa tekserý nátıjesin shyǵardy.

Memlekettik eńbek ınspektsııasy komıteti Abaı oblysy boıynsha departamenti Semeıde shyrsha bezendirip jatyp jaraqat alǵan muǵalim isine qatysty 2024 jyldyń 25 jeltoqsanynda arnaıy komıssııa qurǵan. 

- Sol komıssııanyń tekserý qorytyndysymen belgili bolǵandaı, oqıǵa bolǵan kúni Qýat Aıtqalıevke eńbek qyzmetine baılanysty akti jasalynyp, tabystalǵan. Eńbek qyzmetine baılanysty bolýy sebebi muǵalim ortalyq alańǵa mektep dırektorynyń tapsyrmasy boıynsha barǵan. Komıssııamen jumys berýshiniń kinási 100% dep sheshildi, jumyskerdiń kinási joq, - dep habarlady memlekettik eńbek ınspektsııasy komıtetiniń baspasóz qyzmetinen. 

Densaýlyǵyna zaqym kelýine baılanysty muǵalimge ýaqytsha eńbekke jaramsyzdyq paraǵy negizinde ortasha eńbekaqysy tólenip otyrmaq. 

- Emge ketken shyǵyndardy óteý boıynsha tólem muǵalimniń osy shyǵyntardy rastaıtyn qujattarynyń negizinde beriledi. Bul rette, QR densaýlyq saqtaý salasyndaǵy zańnamasyna sáıkes tegin medıtsınalyq kómektiń kepildik berilgen kólemi sheńberinde jáne MÁMS júıesinde usynylatyn medıtsınalyq kómekke jumsalatyn shyǵystar ótelýge jatpaıdy. Zańǵa sheńberinde sheshim qabyldaý úshin jınaqtalǵan materıaldar jergilikti polıtsııa organyna joldandy. Sebebi, Qylmystyq Kodekste eńbek qorǵaý talaptaryn buzǵan laýazymdy tulǵalarǵa qoldanylatyn jazalar bar, - delingen aqparatta. 

Eske salsaq, osyǵan deıin Semeıde shyrshany bezendirip jatyp jaraqat alǵan muǵalimniń áıeli kúıeýiniń qazirgi jaǵdaıy qalaı ekenin aıtyp bergeni habarlanǵan.