Semeıde shyrsha bezendirgen muǵalimniń jaraqat alýyna qatysty bilim bóliminiń basshysy jumystan shyǵaryldy

SEMEI. KAZINFORM – Semeı qalasynda bilim bóliminiń basshysy Birjan Bulabaev qyzmetinen bosatyldy.

Onyń jumystan shyǵýyna muǵalimderdi Semeı qalasynyń ortalyq alańyndaǵy jańajyldyq shyrshany bezendirýge zańsyz tartý sebep bolǵan. Sonyń saldarynan muǵalimderdiń biri – Qýat Aıtqalıev zardap shekti.

Oqý-aǵartý mınıstri Ǵanı Beısembaev bul jaǵdaıdy jeke baqylaýyna aldy. Ol mundaı áreketterdiń QR «Pedagog mártebesi týraly» Zańyn óreskel buzatynyn aıtty.

- Muǵalimderdi kásibı qyzmetine qatysy joq jumystarǵa tartýǵa tyıym salynady. Tergeý amaldary talapqa saı júrgizilip, osyndaı jaǵdaıdyń qaıtalanbaýy úshin tıisti sharalar qabyldanady dep senemiz, - dedi ol.

Sondaı-aq Ǵanı Beısembaev zardap shekken ustaz ben onyń otbasyna qoldaý bildirdi. Qazir Qýat Aıtqalıevke barlyq qajetti medıtsınalyq kómek kórsetilip jatyr.

Eske salsaq, osyǵan deıin semeılik muǵalim shyrsha bezendirý kezinde jaraqat alǵany habarlanǵan.