Semeıde sharýa qojalyǵynan 36 bas mal urlaǵan er adam ustaldy

SEMEI. QazAqparat – Semeıdegi sharýa qojalyǵynan 36 bas mal urlaǵan er adam quryqtaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, «102» jedel arnasyna jergilikti sharýa qojalyǵynyń 46 jastaǵy basshysy habarlasqan.

Óz sózinde ol belgisiz bireýlerdiń erkin jaıylymnan 36 bas usaq malyn urlap ketkenin jetkizdi.

Osynyń saldarynan jábirlenýshige kelgen materıaldyq zalal mólsheri shamamen 1 500 000 teńgeni quraǵan.

«Jedel-izdestirý sharalaryn júrgizgen polıtsııa qyzmetkerleri kúdiktini ustady. Mal urlyǵyn kórshi qojalyqtardyń birinde jumys isteıtin 54 jastaǵy adamnyń jasaǵany belgili boldy. Jaýap alý kezinde ol óz kinásin moıyndady», - dep habarlady vedomstvo ókilderi.

Ustalǵan adam qolhatpen bosatyldy.

Qazirgi ýaqytta atalǵan fakti boıynsha QR QK 188-baby 1-bóligine sáıkes sotqa deıingi tergeý amaldary bastaldy.