Semeıde Shákárim Qudaıberdiulynyń 160 jyldyǵyna arnalǵan konferentsııa ótti
Jıynǵa Abaı aýdanynyń ákimi bastaǵan jıyrmaǵa jýyq delegat, bir kezderi Abaı aýdanynyń ekonomıkasy men mádenıetiniń gúldenýine óz eńbegin sińirgen, kıeli mekende ár jyldary qyzmet etken azamattar, qaladaǵy birqatar oqý oryndarynyń basshylary qatysty. Sondaı-aq, Balqash, Pavlodar, Astana qalalarynan Shákárim urpaqtary arnaıy keldi.
Konferentsııada sóz alǵan Abaı aýdanynyń ákimi Jarqynbek Baısabyrov Shákárimniń 160 jyldyǵyna oraı aýdanda atqarylǵan birqatar sharalarǵa toqtaldy. Aıtýynsha, bıyl dástúrli túrde ótetin kórkemónerpazdar baıqaýy aqynnyń mereıtoıymen oraılastyrylyp, oǵan myń jarymnan astam adam qatysqan eken. Sonymen qatar Qaraýyl aýylyndaǵy Shákárim alańyna aǵymdaǵy jóndeý jumystary júrgizilip, abattandyrylǵan. Bıyl alǵash ret aımaqtyń túrli etnos jastary arasynda «Shákárim oqýlary» baıqaýyn Abaı elinde ótkizý josparlanypty. Taǵy bir aıta keter mańyzdy másele, osy jyly «Nurly jol» baǵdarlamasy arqyly ulylar mekenine baratyn jol qurylysyna 2 mlrd 487 mln teńge bólinip, 28,8 shaqyrym jóndeýden ótkizilmek.
«Aýdandyq qoǵamdyq keńes múshelerimen toı qarsańynda Óskemen qalasynan bir kóshe berý jóninde bastama kóterilgen-di. Usynys oblys basshylyǵynyń, máslıhat depýtattarynyń qoldaýyna ıe bolyp, Óskemendegi burynǵy Voroshılov kóshesi Shákárim dańǵyly bolyp ózgertildi. Ár zeıindi azamat rýhanı kúsh-jigermen uly danyshpandarymyzdy ulyqtaýǵa atsalysatyn bolsa, jan dúnıesi tazaryp, kóńili ósetindigine senemiz. Ulylarǵa qyzmet - halyqqa qyzmetpen teń»,-dedi J.Baısabyrov.
Sonymen qatar jıynda Shákárim Qudaıberdiulynyń urpaqtarynyń biri - Quralaı Ýaqbaeva sóz aldy. Respýblıkalyq konferentsııaǵa ol Pavlodar qalasynan kelgen eken.
«Anam eshqandaı týysyn kóre almaı, dúnıeden ótti. Áli esimde, ol kezde, 1961 jyly 8-synypta oqımyn, Ahat naǵashym anamdy izdep kelipti. Ekeýi bir saǵattaı sóılesti. Aýyldan keterinde: «Ázirge tis jarmańdar, keıin úlkeıtip alyńdar» dep Shákárim atamnyń sýretin berip, atamnyń «Bul án burynǵy ánnen ózgerek» áni men óziniń shyǵarǵan óleńin aıtyp, úıretip ketken bolatyn. Qazir Ahat naǵashym amanat etip ketken sýreti tórimizde ilinip tur, ánderin de aıtyp júremiz»,-deıdi Quralaı Ýaqbaeva.
Bıyl aqynnyń 160 jyldyǵy qarsańynda Pavlodar qalasynyń orta bilim beretin mektepteriniń birinde «Shákárimtaný» ortalyǵynyń ashylǵanyn qýanyshpen jetkizdi Quralaı Ýaqbaeva. Ortalyqta Shákárimniń eńbekteri qoıylǵan, Semeıden arnaıy jýrnaldar da ákelingen eken.
- Ótken jyldyń aqpan aıynda ortalyq ashýdyń alǵashqy jumystaryn qolǵa alǵan edik. Bir jyl kóleminde qajetti qujattar men materıaldardy jınadyq. Semeıdegi Shákárim atyndaǵy ýnıversıtet pen Jıdebaıdaǵy Abaı murajaıynda bolyp, kóptegen derekter men kitaptardy alyp keldim. Óskeleń urpaqty ulaǵatty etip tárbıeleýge, danalar sózin boılaryna sińirýge bul ortalyqtyń bir paıdasy tıedi dep senemin,-deıdi Shákárim Qudaıberdiulynyń urpaǵy.
