Semeıde shaqalaqty qoqys jáshigine tastaǵan burynǵy polıtseılerge qatysty sot úkimi shyqty
SEMEI. KAZINFORM — Abaı oblysynyń qylmystyq ister jónindegi mamandandyrylǵan aýdanaralyq soty jańa týǵan sábıiniń ólimine kináli dep tanylǵan burynǵy polıtsııa qyzmetkerlerine qatysty úkim shyǵardy.
Er adam ómir boıyna bas bostandyǵynan aıyryldy. Al balanyń anasy sot zalynda jazasyn óteýden bosatyldy. Buǵan qosa, ekeýi de polıtsııa shenderinen aıyryldy.
Sot protsesi bıyl aqpan aıynda bolǵan qoǵamda úlken rezonans týdyrǵan qaıǵyly oqıǵaǵa núkte qoıdy.
Ata-anasyna taǵaıyndalǵan jazalardyń aıtarlyqtaı aıyrmashylyǵy olardyń áreketterine berilgen quqyqtyq baǵaǵa baılanysty.
— Sot úkimimen A.E. Qazaqstan Respýblıkasy Qylmystyq Kodeksiniń 100-baby («Ananyń jańa týǵan balasyn óltirý») boıynsha kináli dep tanylyp, eki jylǵa bas bostandyǵynan aıyryldy. Alaıda Qazaqstan Respýblıkasynyń jańa Konstıtýtsııasynyń qabyldanýyna baılanysty raqymshylyq jasaý týraly zańǵa sáıkes, ol jazasyn óteýden bosatyldy. Al B.S. atalǵan Kodekstiń 99-baby 3-bóligine («Kámeletke tolmaǵan adamdy óltirý») sáıkes kináli dep tanyldy. Bul bapta ómir boıyna bas bostandyǵynan aıyrý túrindegi jaza kózdelgen, — dep habarlady sottyń baspasóz qyzmetinen.
Sot úkimi áli zańdy kúshine engen joq.
Eske salsaq, osyǵan deıin aqsha jymqyrǵan «Taza Óskemen» kásiporny basshylarynyń jazasy 7 jylǵa uzartylǵany habarlanǵan.
