Semeıde «Sergek» kameralarynyń nazaryna 123 myńnan astam buzýshylyq ilikti
ASTANA. KAZINFORM — «Sergek» júıesi Semeıde 123 myńnan astam jol qozǵalysy erejesin buzýdy tirkedi, dep habarlaıdy Abaı oblysy Polıtsııa departamentiniń baspasóz qyzmeti.
— Jyl basynan beri Semeı qalasynda «Sergek» júıeleri jol qozǵalysy erejelerin buzýdyń 123 693 deregin tirkedi. Qalada 919 beınebaqylaý kamerasyn qamtıtyn 130 foto jáne beınefıksatsııa kesheni jumys isteıdi. Kameralar júrgizýshiler men jaıaý júrginshilerdiń qaýipsizdigin qamtamasyz etýge kómektesedi. Olardyń nazarynan «sońǵy sátte úlgerip qalýǵa» tyrysatyn qaýipti áreketter de tys qalmaıdy — mysaly, baǵdarshamnyń tyıym salatyn sıgnaly janǵannan keıin qıylystan ótý, — deıdi tártip saqshylary.
Aqyldy kómekshilerdiń múmkindikteri jol qozǵalysy erejelerin buzýdy tirkeýmen ǵana shektelmeıdi. Olardyń kómegimen polıtseıler urlanǵan kólikterdiń ornalasqan jerin anyqtaıdy, kólikti mas kúıinde basqarý faktileriniń jolyn kesedi jáne kólik urlyǵyna kúdiktilerdi ustaıdy.
Beınejazbalar jol-kólik oqıǵalarynyń mán-jaıyn qalpyna keltirýge, jaıaý júrginshini qaǵyp ketken jáne oqıǵa ornynan boı tasalaǵan júrgizýshilerdi anyqtaýǵa da kómektesedi.
Abaı oblysy Polıtsııa departamenti júrgizýshilerdi jol qozǵalysy erejelerin saqtaýǵa shaqyrady: árbir qaýipti manevrdiń artynda bireýdiń ómiri tur. Kameralar joldaǵy barlyq adamnyń qaýipsizdigi úshin qajet.
Buǵan deıin tamyzda Almatyda elektr energııasynyń óshý jaǵdaılary baıqaldy. Osyǵan baılanysty Kazinform tilshisi blekaýt kezinde «Sergek» beınebaqylaý keshenderiniń qalaı jumys istegenin anyqtady.
