Semeıde salynyp jatqan kópqabatty úıden órt shyqty
SEMEI. QazAqparat - Semeı qalasynda salynyp jatqan kópqabatty turǵyn úı órtendi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 18 qarasha kúni saǵat 9.45-te Qaraǵaıly yqshamaýdanynda qurylysy júrgizilip jatqan kópqabatty turǵyn úıden órt shyqty. Jalyn úıdiń 2 men 9 qabattar arasyndaǵy syrtqy qabyrǵasyn sharpyǵan.
- Oqıǵa ornyna dereý kelip jetken órt sóndirýshiler jalpy aýdany 300 sharshy metr aýmaqty sharpyǵan tilsiz jaýdy sóndirdi. Qazirgi ýaqytta ottyń shyǵý sebebi anyqtalýda, - dep habarlady vedomstvo ókilderi.
Aıta keteıik, órtti óshirýge jeke quramnan 30 adam men 7 tehnıka jumyldyrylǵan.
