Semeıde salmaǵy 1 tonnaǵa jýyq kólikterdi kóteretin azamat turady
SEMEI. QazAqparat - Semeılik Zakır Naımanbaevty kópshiligi áleýmettik jeli arqyly jaqsy tanıdy. Naqtyraq aıtqanda 24 jastaǵy paýerlıfter 250 keli zil temirden bastap salmaǵy 1 tonna bolatyn kólikterdi kóterip júrgen azamat, dep habarlaıdy QazAqparat tilshisi.
Zakır 1994 jyly 18 naýryzda Semeı qalasynda dúnıege kelgen. 11 jasynda alǵash ret ákesi shymyr deneli azamat bolyp óssin dep jattyqtyrý zalyna ákelgen eken. Sodan beri sporttan qol úzgen emes. Al paýerlıftıngpen kásibı túrde aınalysýdy 16 jasynda bastaǵan.
«Alǵash ret 16 jasymda qalalyq chempıonatta baq synadym. Jarysqa menimen shamalas júzdegen paýerlıfter jınaldy. Biraq qarsylastarymnan basym túsip, ekinshi oryn aldym. Shalqalap jatyp jalpy salmaǵy 225 keli bolatyn zil temirdi kóterdim»,-deıdi Zakır.
Alǵashqy jeńisi Zakırdiń paýerlıftıng sportyna degen qyzyǵýshylyǵyn odan saıyn arttyrǵan. 17 jasynda Qazaqstan chempıonatyna qatysyp, 175 kelini kóterip, ekinshi orynǵa ıe bolsa, 2012 jylǵy Azııa chempıonatynda baq synap, taǵy júldegerler qatarynan kórindi. Al 2015 jyly Álem chempıonatynda 225 kelini kóterip, 2-shi oryn aldy. Búgingi kúni ol shalqalap jatyp 250 kelini kóteretetin Qazaqstandaǵy rekordshynyń biri.
«Alǵa qoıǵan maqsatym kóp negizi. Solardyń biri bozkilemde beldesý. ıAǵnı, qazir qazaq kúresin qolǵa aldym. Aldaǵy ýaqytta osy sport túrinen jarystarǵa qatysqym keledi. Kúnimniń teń jartysy jattyǵý zalynda ótedi»,-dedi sportshy.
Sonymen qatar Zakır sońǵy kezderi salmaǵy 1 tonna bolatyn avtokólikterdi kóterip, tanylyp júrgenderdiń biri. Sportshy avtomobıldi kóterýdi kópten armandaǵanyn aıtady. Ol úshin aýyr salmaqty kóterý qalypty jaǵdaı bolǵanmen kólikti kóterýge kelgende ishteı biraz ýaqyt daıyndalǵanyn jetkizdi.
«Aýyr salmaqty shtangilerdi kóterip júrgendikten kúshimdi kórsetetin odan da aýyr salmaqty kóterýge tyrysýdyń ýaqyty keldi dep sheshtim. Sondyqtan sońǵy kezde túrli kólikterdi kóterip júrmin. Bul da maǵan alǵa umtylýǵa kúsh-jiger beredi desem bolady. Jáne bul jastardyń qyzyǵýshylyǵyn arttyrýda. Olarǵa qolymnan kelgenshe aqyl-keńes berip, óz bilgenimdi aıtyp júremin».
Sonymen qatar Zakır qara kúshin túrli ádistermen dáleldep júr. Mysaly, ol bir qolymen salmaǵy 80 keli azamatty jáne 16 kelilik gir tasyn, ekinshi qolymen ekinshi 16 kelilik gir tasyn bir mezette kóteredi.
Jas sportshynyń maqsaty - elimizde paýerlıftıng sportynyń damýyna úles qosyp, ózindik qoltańbasyn qaldyrý.
