Semeıde respýblıkalyq stýdenttik teatr festıvali ótip jatyr

SEMEI. QazAqparat – Semeıde aqyn, oıshyl Shákárim Qudaıberdiulynyń 165 jyldyq mereıtoıy aıasynda «Adamdyq boryshyń...» atty respýblıkalyq stýdenttik teatr festıvali ótip jatyr, dep habarlaıdy QazAqparat tilshisi Shákárim ýnıversıtetiniń baspasóz qyzmetine silteme jasap.

29 sáýirde bastalǵan óner báıgesine elimizdiń barlyq óńirinen 7 joǵary oqý ornynyń stýdentteri qatysyp jatyr.

Abaı atyndaǵy Qazaq ulttyq pedagogıkalyq ýnıversıtetiniń «Shyń» jáne «Úrker», «Turan» ınnovatsııalyq-kásipkerlik ýnıversıtetiniń «TeART», Qazaq sport jáne týrızm ýnıversıtetiniń «Rýhanııat», S.Amanjolov atyndaǵy Shyǵys Qazaqstan ýnıversıtetiniń «Shabyt», L.Gýmılev atyndaǵy Eýrazııa ulttyq ýnıversıtetiniń «Shańyraq», S.Seıfýllın atyndaǵy Qazaq agrotehnıkalyq ýnıversıtetiniń «Aqjelken» teatrlary óner kórsetýde.

Ónerli jastardy qoldaý maqsatynda uıymdastyrylǵan baıqaýdyń júlde qory – 1 mıllıon teńge.

Teatr synshylary men óner qaıratkerlerinen quralǵan qazylar alqasy tańdalǵan taqyryp, sahnalyq kıim úlgisi, dekoratsııa men akterlerdiń sheberligin tarazylap, úzdikterdi anyqtamaq.

Qazylar alqasynyń quramynda Semeıdegi Abaı atyndaǵy memlekettik mýzykalyq drama teatrynyń kórkemdik jetekshisi Erbol Jýasbek, akter, «Darıǵa-aı» jastar teatrynyń kórkemdik jetekshisi Erkebulan Nuǵymanov, «Darıǵa-aı» jastar teatrynyń ádebıet bóliminiń meńgerýshisi, «Mádenıet salasynyń úzdigi» Gúljan Qudaıbergenova bar.