Semeıde radıologııalyq ortalyq qurylysynyń merdigerlerine úkim shyǵaryldy
ÓSKEMEN. QazAqparat - Semeı qalasynyń №2 qalalyq soty radıologııalyq ortalyq qurylysy kezindegi aqsha jymqyrý boıynsha qylmystyq isti qaraýdy aıaqtady jáne istiń úsh fıgýrantyna úkim shyǵardy, dep habarlaıdy «QazAqparat» HAA tilshisi.
Іs materıaldaryna sáıkes, aqshany merdiger fırma dırektory men onyń orynbasary oblystyq qurylys basqarmasyndaǵy sheneýnik kómegimen jymqyrǵan. Alaıaqtyq bir tásil boıynsha júrgizilgen. ShQO qurylys, sáýlet jáne qala qurylysy basqarmasynyń basshylyǵy iske qosý men jóndeý jumystarynyń júrgizilgeni jáne jabdyqtardyń paıdalanýǵa berilgeni týraly jalǵan aktilerge qol qoıǵan.
Sondaı-aq, qylmystyq is fıgýranttary 600 mıllıon teńgeden astam salyq tólemegeni úshin de aıyptaldy.
ShQO qurylys basqarmasyndaǵy sheneýnikke jalpy rejim kolonııasyna jeti jylǵa bas bostandyǵynan aıyrý, múlkin tárkileý jáne memlekettik qyzmette jumys isteý quqyǵynan ómir boıyna aıyrý jazasy taǵaıyndaldy. Merdiger uıym basshysyna 5,5 mıllıon teńge aıyppul salynyp, 8,5 jylǵa qamaldy jáne 10 jyl kommertsııalyq uıymdarda basshylyq qyzmet atqarýǵa tyıym salyndy. Onyń orynbasaryna 8 jyl úkim kesildi.
№2 sottyń baspasóz qyzmetiniń habarlaýynsha, úkim áli zańdyq kúshine engen joq.
