Semeıde iri saýda úıindegi órt sóndirildi
SEMEI. KAZINFORM – Semeı qalasynda iri saýda úıindegi qyzyl jalyn tolyqtaı óshirildi.
Qaladaǵy kıim-keshek saýdalanatyn eń iri saýda ornynda 6 jeltoqsanda tańǵy saǵat 3.00 shamasynda órt shyqqan edi. Órt sóndirýshiler 2 mınýtta oqıǵa ornyna jetken kezde birinshi qabatta saýda býtıkteri janyp jatty. Qas qaǵymda órt 2-shi qabat pen shatyrǵa taralyp ketken.
«Ǵımarat ishindegi qoıý tútin men ystyq temperatýra, janǵysh materıaldardyń kóptigi jáne ǵımarat qurylysynyń kúrdeli bolýy saldarynan órt tez taralyp, ony sóndirý jumystary qıyndady. Tilsiz jaýmen kúres barysynda 3-shi qabattyń shatyry ishinara qulady», - dep habarlady Abaı oblystyq Tótenshe jaǵdaılar departamentinen.
Qalalyq Mádenıet úıinde TJD jáne Densaýlyq saqtaý basqarmasynyń psıhologtary kásipkerlermen jumys júrgizdi. Barlyǵy 200-den astam kásipkerge shuǵyl-psıhologııalyq kómek kórsetildi.
«Órtti sóndirýge TJ jáne Polıtsııa departamentterinen, apattar medıtsınasy ortalyǵynan, TJM 68303 áskerı bóliminen, «QTJ» UK» AQ, Ulttyq ulannyń 5511 áskerı bóliminen, «Zelenstroı» JShS-nen 487 adam, 46 tehnıka jáne 1 órt sóndirý poıyzy jumyldyryldy. Qyzyl jalyn saǵat 20.55-te tolyqtaı óshirildi. Ottyń shyǵý sebebi anyqtalyp jatyr», - delingen aqparatta.
Qazirgi ýaqytta órt ornyn qaraýyldaý, sý tógý jáne qorshaý úshin jeke quramnan 264 adam men 31 tehnıka tartylǵan.
