Semeıde PTR testiniń jalǵan anyqtamasyn qoldanǵan er adam jaýapqa tartyldy

SEMEI. QazAqparat – Semeı qalasynyń turǵyny PTR testiniń jalǵan anyqtamasyn qoldanǵany úshin 80 saǵattyq qoǵamdyq jumysqa tartyldy, dep habarlaıdy QazAqparat tilshisi.

ShQO boıynsha QAJD baspasóz qyzmetiniń málimetine súıensek, PTR testiniń jalǵan anyqtamasymen jumys ornyna kirmek bolǵan er adam sottaldy. Oqıǵa ótken jyldyń kúzinde bolǵan.

Sot barysynda ol kinásin moıyndap, istegen isine qatty ókinetinin aıtty. Sýdıa sheshimi boıynsha qala turǵyny 80 saǵat qoǵamdyq jumysqa tartyldy.

«Úkim shyqqan soń er adam probatsııa qyzmetine esepke qoıyldy. Ony qoǵamdyq jumystardy oryndaý úshin jergilikti atqarýshy organǵa joldadyq. Endi ol kún saıyn 4 saǵattan qoǵamdyq oryndarda qar kúrep, qoqys jáshikterin tazalaıdy. Eger ol qoǵamdyq jumystardy oryndaýdan jaltarsa, onda bas bostandyǵynan aıyrylýy múmkin», - dedi departamenttiń resmı ókili Saltanat Ojıkanova.