Semeıde psıhotroptyq zattardy jetkizýge qatysqan stýdent 5 jylǵa sottaldy

SEMEI. KAZINFORM — Abaı oblysynda kolledj stýdenti psıhotroptyq zattardy satý isine qatysqany úshin 5 jylǵa bas bostandyǵynan aıyryldy. 

Abaı oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń 5 qarashadaǵy úkimi boıynsha Semeı qalasynyń kámeletke tolmaǵan turǵyny, kolledjdiń úshinshi kýrs stýdenti psıhotroptyq zattardy ótkizýge qatysqany úshin sottaldy.

Kámeletke tolmaǵan jasóspirim «jasyryn belgileýshiler» rólinde bir aıdan sál astam ýaqyt jumys istegen.

— Jasyn jáne istiń mán-jaıyn eskere otyryp, sot oǵan kámeletke tolmaǵandardy ustaýǵa arnalǵan ortasha qaýipsizdik deńgeıindegi qylmystyq-atqarý júıesi mekemesinde óteýge tıis 5 jyl merzimge bas bostandyǵynan aıyrý jazasyn taǵaıyndady, — delingen habarlamada.

Aıta ketelik Semeıde 51 jastaǵy azamattan 32 keliden asa esirtki tárkilengen edi.