Semeıde poıyz qaǵyp ketken qyz aman qaldy
SEMEI. QazAqparat - Semeıde júk poıyzy qaǵyp ketken qyz qulaqqapta bolǵan. Bul týraly Semeı stansasyndaǵy Jelilik ishki ister bóliminen málim etti, dep habarlaıdy QazAqparat.
Buǵan deıin habarlaǵanymyzdaı, oqıǵa 13 sáýir kúni saǵat 22.30-da qala ortalyǵynda boldy.
Semeı stansasyndaǵy Jelilik ishki ister bóliminiń ınspektory Altyn Qasenovanyń aıtýynsha, 21 jastaǵy boıjetken eki qurbysymen birge dúkennen shyǵyp, temirjoldy kesip ótpekshi bolǵan. Biraq qyzdar uıaly telefon arqyly hat jazysyp, mýzyka tyńdaǵan kúıi jaqyn jerde poıyz kele jatqanyn múlde ańǵarmaǵan. Bolat joldarǵa tym jaqyn bolǵan olardyń birin poıyz qaǵyp ketken. Qazir oblystyq aýrýhanada em qabyldap jatqan boıjetkenniń jaǵdaıy "ortasha aýyr" dep baǵalanýda. Qyzdardyń barlyǵy qaladaǵy Shákárim ýnıversıtetiniń stýdentteri.
«Qazir ol dárigerlerdiń qaraýynda. Tekserý jumystary júrgizilip jatyr. Qyzdardyń barlyǵynda qulaqqap bolǵan. Sondyqtan poıyzdyń daýysyn da, kele jatqanyn da elemegen. Poıyz jolynan ótken ýaqytta qaýipsizdik erejelerin kópshilik saqtamaıdy. Saldarynan osyndaı oqys oqıǵalar tirkeledi. Mysaly byltyr qalada 10 adamdy poıyz qaqty. Onyń 4-eýi kóz jumdy. Barlyq turǵyndardy temirjoldan ótkende abaı bolýǵa shaqyramyz», - dedi Altyn Qasenova.
