Semeıde polıtseıler er adamnyń ómirin saqtap qaldy
ASTANA.KAZINFORM - Semeı qalasynda patrýldik polıtsııa qyzmetkerleri júrek talmasy ustaǵan er adamǵa der kezinde kómek kórsetip, onyń ómirin saqtap qalýǵa yqpal etti.
Polıtsııa qyzmetkerleri Ashat Shaıahmetov pen Nursultan Qýanyshbaev qalanyń ortalyq bóligin patrýldeý kezinde úı qabyrǵasyna súıenip turǵan er adamdy baıqaıdy. Jaǵdaıyn suraǵan sátte azamat júreginiń qatty aýyrǵanyn aıtyp, esinen tana bastaǵan.
ІІM baspasóz qyzmeti málimetinshe, tártip saqshylary birden jedel járdem shaqyryp, er adamdy qaýipsiz qalypqa jatqyzyp, dárigerler jetkenshe esin joǵaltpaýǵa kómektesken.
— Tynys al… eń bastysy — tynys al, - dep qaıtalap otyrǵan polıtseılerdiń biri er adamnyń janynan bir sátke de ketken joq.
Birneshe mınýttan keıin oqıǵa ornyna jedel járdem kelip, polıtseıler medıtsına qyzmetkerlerine naýqasty kólikke kirgizýge kómektesti.
— Biz tek kerek ýaqytta, kerek jerde boldyq, - deıdi ınspektorlar.
Aıta keteıik, Ulytaý oblysynda qutqarýshylar er adamdy órtten qutqaryp, jarylystyń aldyn aldy.
