Semeıde polıtseıdi qaǵyp kete jazdaǵan júk kóligi júrgizýshisi ustaldy

ASTANA. KAZINFORM – Semeı qalasynda aýyr júk kólikterine baqylaý kúsheıtildi.

Polıtsııa qyzmetkerleri men qoǵamdyq uıym ókilderi jol ınfraqurylymyn saqtap, qozǵalys qaýipsizdigin arttyrý maqsatynda reıdterdi jalǵastyryp jatyr.

Mamandardyń aıtýynsha, joldardyń merziminen buryn tozýy kóbine ruqsat etilgen salmaqtan asyp túsetin júk kólikteriniń qozǵalysyna baılanysty. Sondyqtan tek negizgi avtojoldar ǵana emes, iri gabarıtti tehnıkanyń qatynaıtyn baǵyttary, sonyń ishinde aspaly kópir de baqylaýǵa alynǵan.

Qoldanystaǵy normalar boıynsha:

– úsh osti kólikter úshin – 25 tonna,
– tórt osti kólikter úshin – 32 tonna,
– bes osti kólikter úshin – 38 tonna,
– al alty jáne odan da kóp osti tehnıka úshin 44 tonna salmaqqa ruqsat etiledi.

Reıd barysynda birneshe júrgizýshi baqylaýdan qashýǵa tyrysqan. Solardyń biri artyq júkten qutylý úshin topyraqty turǵyn úıdiń qasyna tógip, qorshaýdy zaqymdaǵan. Keıin polıtseılerdiń toqtaý týraly talabyn elemeı, ári qaraı júrip, bir qyzmetkerdi qaǵyp kete jazdaǵan.

«Ruqsat etilgen massany asyrý, qoǵamdyq aýmaqty lastaý jáne polıtsııanyń zańdy talabyna baǵynbaý sııaqty birneshe quqyqbuzýshylyq anyqtaldy. Júrgizýshiniń kóligi aıypturaqqa qoıyldy», – dep habarlady polıtsııa departamenti.

Oqıǵa materıaldary ári qaraı qaraýǵa joldandy.

Buǵan deıin «Almaty-Óskemen» tasjolynda júk kóligi órtengeni habarlanǵan edi.