Semeıde polıtsııa qolyna «Leha-Maımysh» laqap esimdi «zańdaǵy ury» tústi
ASTANA. 11 qańtar. QazAqparat /Jasulan Joldybaev/ - Semeıde «Leha-Maımysh» degen laqap esimmen belgili «zańdaǵy ury» polıtsııa qolyna tústi.
Bul týraly búgin elordada QR ІІM-niń resmı ókili Nurdildá Oraz málim etti.
53 jastaǵy «Leha-Maımysh» Semeı qalasynda atys qarýyn zańsyz saqtaǵany úshin ustalyp otyr. Odan oq dárisi bar «Makarov» tapanshasy alyndy.
Sonymen qatar osy aptada Almaty qalasynda esirtkiniń zańsyz aınalymy úshin qylmystyq ortanyń 50 jastaǵy «serkesi» jáne Petropavl qalasynda uıymdasqan qylmystyq toptyń 32 jastaǵy jetekshisi jáne 27 jastaǵy qatysýshysy qamaýǵa alyndy.
Jalpy ótken aptada uıymdasqan qylmystyń jolyn kesýge baǵyttalǵan jedel-izdestirý jáne arnaıy is-sharalary kezinde 16 qylmystyq is qozǵalyp, 1 «zańdaǵy ury», qylmystyq ortanyń 1 «serkesi», uıymdasqan qylmystyq toptyń 1 jetekshisi jáne 2 qatysýshysy qylmystyq jaýapkershilikke tartyldy. Zańsyz aınalymnan granata, karabın, 3 tegis uńǵyly qarý, 3 tapansha alyndy.
Ustalǵan adamdardyń barlyǵy qamaýǵa alyndy.
