Semeıde polıtseıler 4 adamdy órtten qutqardy
SEMEI. QazAqparat – Semeı qalasynda 2 polıtsııa qyzmetkeri 4 adamdy órtten qutqardy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 24 qańtarda saǵat 02.48-de Parhomenko kóshesindegi jer úıden órt shyqqany jaıly habar túsken. Qyzyl jalyn úıdiń kireberisi men shatyrdyń aǵash qurylymdaryn sharpydy. Órttiń jalpy aýmaǵy 70 sharshy metrge jetken.
«Órt sóndirýshiler kelip jetkenshe sol mańaıda júrgen polıtsııa qyzmetkerleri Dıas Aǵzamov pen Azamat Ibraıhanov tereze arqyly ishke kirgen. Jedel qımyldaǵan saqshylar 1963 jylǵy er adamdy, onyń 1967 jylǵy áıelin, 18 jastaǵy ulyn jáne 90 jastaǵy ákesin syrtqa alyp shyqty. Olarǵa eshqandaı zaqym kelgen joq», - dep habarlady vedomstvo ókilderi.
Aldyn ala málimet boıynsha órttiń shyǵýyna – elektr jabdyqtarynyń apattyq rejımi nemese otpen abaısyz áreket etý sebep bolýy múmkin.
