Semeıde «páter satyp alatyn» alaıaqtar kóbeıgen
ASTANA. QazAqparat - Semeıde alaıaqtardyń sany artyp otyr. Ótken jyldyń on bir aıynyń qorytyndysy boıynsha Semeıde 500-den astam osyndaı qylmys túri tirkelgen, dep jazady Altaynews.
Ásirese ınternet jáne telefon arqyly utys jóninde habarlama jiberip, jurtty san soqtyrǵandar kóp. Ańǵal turǵyndar bolsa «Kólik utyp aldyńyz, endi ony rásimdeý úshin biraz qarajat aýdaryńyz» degen sms habarlamalarǵa senip qala beredi eken.
Polıtseıler jańa jyl qarsańynda mundaı alaıaqtyqtyń kóbeıetindigin aıtyp halyqqa saq bolýdy eskertip otyr.
Qalalyq ІІB basshysynyń orynbasary Álı Tólegenovtyń aıtýynsha, kúdiktiler áýeli «páter satyp alamyz» dep jarnama beredi. Munan keıin zardap shegýshi azamattarǵa «shotyńyzǵa kerek qarjyny aýdaramyz, tek aldymen bizdiń shotqa esep aıyrysýdy jyldamdatý úshin azyn-aýlaq qarajat jiberseńiz» dep qolqa salady. Nátıjesinde tátti úmitke aldanǵan turǵyn aqshasynyń shetel asyp ketkenin biraq biledi eken.
