Semeıde para alǵan vokzal qyzmetkerine qatysty is qozǵaldy
Aǵymdaǵy jyldyń sáýirinde Semeı bólimshesi magıstraldy jeli bólimi bastyǵynyń kómekshisi, azamatsha Sadyqova áriptesine basqa bólimshege aýystyrý jóninde usynys jasaǵan. Biraq bul qyzmeti úshin ol 350 myń teńge suraıdy. Al qarajatty máseleni oń sheshý úshin basshylyqqa beretinin jetkizgen. 10 sáýir kúni áriptesi 200 myń teńgeni ákelip beredi. Al 16 sáýir kúni qalǵan 150 myń teńgeni alyp jatqan ýaqytta Semeı óńiri boıynsha sybaılas jemqorlyqqa qarsy qyzmet qyzmetkerleri Sadyqovany qolǵa túsirgen. Qazir burynǵy bastyqtyń kómekshisiniń ústinen qylmystyq is qozǵalyp, sotqa deıingi tergeý júrip jatyr.
Sybaılas jemqorlyqqa qarsy kúres basqarmasynyń qyzmetkerleri temirjolshylarmen kezdesý ótkizip, aldaǵy ýaqytta jemqorlyqqa jol bermeýge shaqyrdy. Búgingi kúni «QTJ» UQ» AQ-nyń qyzmetkerleri arasynda jemqorlyq jıilep ketken. Tek ótken jyldyń ózinde 9 qyzmetkerdiń ústinen para alǵany úshin is qozǵalǵan.
«2017 jyly Semeı fılıalynyń laýazymdy tulǵalaryna qatysty 9 qylmystyq is qozǵaldy. Atap aıtqanda «Shaǵan» stantsııasynyń jaýapty kezekshisi Tileýberdın, jeke kásiporynnyń dırektory Orynbasarov, «Belaǵash» stantsııasynyń bastyǵy para alǵany úshin qylmystyq jaýapkershilikke tartyldy. «Qazaqstan Temir Joly» UK» AQ bizdiń turaqty baqylaýymyzda. Sebebi, jemqorlyq kóbeıip keledi. Esterińizge sala keteıik, quqyqbuzýshylyqqa jol bergen kez-kelgen qyzmetker, tipti jumys istemeıtin adam da jaýapqa tartylady», - dedi Semeı óńiri boıynsha sybaılas jemqorlyqqa qarsy kúres basqarmasynyń jetekshisi Ǵalymjan Qoshqarbaev.
Jalpy Semeı óńiri jemqorlyq boıynsha respýblıkada úshinshi orynda tur. Ásirese bilim berý, jergilikti bılik jáne quqyq qorǵaý organdary arasynda jıi tirkeletin kórinedi.