Semeıde para alǵan bilim bólimi basshysynyń orynbasary sottaldy
ÓSKEMEN. QazAqparat - Semeı qalasynyń qylmystyq soty bilim bólimi basshysynyń burynǵy orynbasary Sara Eleýsizovaǵa úkim oqydy, dep habarlaıdy «QazAqparat» HAA tilshisi.
«Semeı qalasy bilim bólimi» MM basshysynyń orynbasary laýazymynda otyryp, ol birneshe aqshalaı nemese taýarlar túrinde (et, kómir, t.b.) para alǵan, tipti talap etken. Qylmystyq is birinshi ınstantsııa sotynda QR QK 366-baby, 3-bóligi, 4-tarmaǵyna sáıkes qaraldy. Eleýsizovaǵa 9 mıllıon 625 myń teńge aıyppul, qylmystyq jolmen tabylǵan múlkin tárkileý, ómir boıy memlekettik qyzmette jáne jergilikti ózin-ózi basqarý organdarynda laýazym ıelený quqyǵynan aıyrý jazasy berildi.
Sot sottalýshyny aıyppuldy úkim zańdy kúshine engennen keıin bir aı merzim ishinde tóleýge mindettedi. Aıyppul tólenbegen jaǵdaıda bas bostandyǵynan aıyrý jazasyna aýystyrylady.
Onyń 18 qyrkúıek kúni «№ 4 Baldáýren ıaslı-baqshasynyń» esepshisinen 10 myń teńge para alǵany anyqtaldy. 20 qazanda 5 kg sıyr eti túrinde para alǵan.
Sybaılas jemqorlyqqa qarsy is-qımyl qyzmetiniń qyzmetkerleri 31 qazanda bilim bólimi basshysynyń burynǵy orynbasaryn naqtylaı aqshamen ustady. Ol sol kúni «Ybyraev atyndaǵy JBBOM» KMM bas esepshisinen 120 myń teńge para alǵan bolatyn.
Úkim áli zańdy kúshine engen joq.
