Semeıde pandýsy joq mekemelerge 400 AEK aıyppul salynady
SEMEI. QazAqparat - Semeıde endi pandýsy joq mekemelerge 400 aılyq eseptik kórsetkishke deıin aıyppul salynady. Bul týraly "Nur Otan" partııasynyń Semeı qalalyq fılıalynyń baqylaý komıssııasynyń otyrysynda aıtyldy, dep habarlaıdy QazAqparat.
Búgingi kúni Semeıde múmkindigi shekteýli jandar jıi baratyn 370-ten asa nysan bar. Alaıda múgedekterdiń áleýmettik mańyzy bar nysandarǵa kedergisiz kirip-shyǵýyna múmkindik beretin pandýstar talaptarǵa saı kelmeıdi. Júrgizilgen jumystardyń arqasynda byltyr 49 nysan múgedekter úshin beıimdelgen. Nátıjesinde arbaǵa tańylǵan jandarǵa kedergisiz kirýge múmkindik berildi.
«Mysaly ǵımaratta pandýs bolǵanymen, kire-beris esik normaǵa sáıkes kelmeıdi. Keıbir nysandarda eki esik bolady. Birinshisinen ótkenmen, ekinshisinen óte almaıdy. Osy sııaqty olqylyqtardy joıý kerek», - deıdi «Nur Otan» partııasy Semeı qalalyq fılıaly tóraǵasynyń birinshi orynbasary Zýlfııa Jamaldınova.
«Standartqa saı pandýstardyń jalpy eni 100 sm, bıiktigi 70 nemese 95 santımetrlik eki deńgeıli tutqasy bolýy kerek. Sondaı-aq, pandýs ár metr saıyn 12 sm. ǵana bıikteý kerek», - deıdi mamandar. Ókinishke oraı osy talaptar kópshilik mekemelerde eskerilmegen. Saldarynan olar múmkindigi shekteýli jandardyń júrip-turýyna qolaısyz.
Endi QR múgedekterdi áleýmettik qorǵaý Zań talaptaryn oryndamaǵan mekeme basshylary ákimshilik jaýapkershilikke tartylady. Mamandardyń aıtýynsha, «Bıýdjettik uıymdarǵa 50, shaǵyn bıznes ókilderine 120, orta kásipkerlik ıelerine 200, iri kásiporyndarǵa 400 aılyq eseptik kórsetkishke deıin aıyppul salynady. Eger ereje buzý qaıtalansa, aıyppul mólsheri de ósedi.
Sonymen qatar, mekemelerge kózi nashar kóretin jandar úshin arnaıy braıl shrıftimen jazylǵan taqtaıshalar ornatý talap etilýde.
