Semeıde otqa oranǵan dúkennen 30 jastaǵy áıel qutqaryldy
SEMEI. QazAqparat - Semeı qalasynda órtke oranǵan dúken ishinen áıel adam qutqaryldy, dep habarlaıdy QazAqparat.
Oblystyq tótenshe jaǵdaılar departamentiniń málimetine sensek, búgin saǵat 10 shamasynda Semeı qalasy Nekrasov kóshesi boıyndaǵy matrats satý dúkeninde órt shyqqqan.
Oqıǵa ornyna der kezinde kelgen órt sóndirýshiler dúken ishi qatty tútindegenin anyqtady.
Ǵımaratqa kirgen gaztútinnen qorǵaý qyzmeti ýly tútin arasynan kómirqyshqyl gazynan ýlanǵan 1991 jylǵy áıel adamdy taýyp, tez arada qaýipsiz jerge shyǵardy.
14 saǵat 39 mınýtta órt tolyq sóndirildi. Barlyǵy 56 órt sóndirýshi jáne 12 arnaıy tehnıka jumyldyryldy.
Jalyndy sóndirýdi ýly tútin jáne kórý múmkinshiligi joqtyǵy qıyndatty.
Órttiń aldyn ala aýdany - 290 sharshy metr.
Tilsiz jaýdyń sebebi - órtke abaısyz bolý jáne elektrqondyrǵylardy qoldaný kezinde órt qaýipsizdik erejelerin saqtamaý.
ShQO TJD órt qaýipsizdik erejelerin qatań saqtaý kerektigin eske salady.
