Semeıde otbasylyq basqosý kezinde 7 adam koronavırýs juqtyrdy
ÓSKEMEN. QazAqparat – Semeı qalasynda otbasylyq basqosý kezinde 7 adam koronavırýs juqtyryp alǵan. Onyń ishinde 3 jasar bala bar, dep habarlaıdy QazAqparat tilshisi.
«Búgingi tańda elimizde shekteý sharalary birtindep jeńildetile bastady. Biraq, ókinishke qaraı bul koronavırýs ınfektsııasynyń taralý qaýpi joq degendi bildirmeıdi. Munyń aıqyn dáleli retinde Semeı qalasyndaǵy jaǵdaıdy aıtýǵa bolady. Otbasylyq basqosý kezinde jeti adam juqpaly indetke shaldyqqan. Onyń ishinde úsh jasar bala bar. Shekteý sharalarynyń jeńildetilýi bizdi basqalar aldyndaǵy jaýapkershilikten bosatpaıtynyn túsinýimiz kerek», - delingen Óskemen ákimdiginiń Instagram paraqshasynda.
Ákimdiktegiler aýa-raıynyń jylynýyna qaramastan adam kóp jınalatyn sharalarǵa barmaýǵa shaqyrdy.
«Jerlesterimizdi ınfektsııanyń taralýyna qarsy birlese kúresýge úndeımiz. Merekelik basqosýlar men otyrystardan ýaqytsha bas tartyńyz. Qazir árqaısymyzda úlken jaýapkershilik jatyr. Tek ortaq kúsh-jigerdiń arqasynda biz bir-birimizdiń ómirimizdi saqtaı alamyz! Biz birgemiz!», - delingen habarlamada.
