Semeıde osy jyly 35 aýla abattandyrylady
SEMEI. QazAqparat – Semeı qalasynda bıyl 35 aýla abattandyrylady, dep habarlaıdy QazAqparat tilshisi.
Qala ákimdiginiń málimetine súıensek, 2022 jyly aýlalardy abattandyrýǵa, balalar, sport jáne fýtbol alańdaryn ornatýǵa 890,5 mln teńge bólingen.
«Jyl sońyna deıin 35 aýla abattandyrylady dep josparlanyp otyr. 23 balalar jáne 7 sport alańdary salynyp, 6 fýtbol alańy abattandyrylady. Bul ótken jylmen salystyrǵanda 8 esege artyq», - deıdi shahar basshysy Baqytjan Baıahmetov.
Sondaı-aq halyqty taza aýyzsýmen qamtamasyz etý jumystary jalǵasýda. Sońǵy 3 jylda 16 sýmen jabdyqtaý obektisin salý jáne rekonstrýktsııalaý nátıjesinde qala halqynyń ortalyqtandyrylǵan sýmen qamtamasyz etilýi 2%-ǵa ósip, 99%-dy qurady.
«Shyǵys, Berezovskıı jáne Bobrovka kentterinde jalpy quny 2,7 mlrd teńge bolatyn sýmen jabdyqtaý jelilerin salý boıynsha jobalar júzege asyrylýda. Budan bólek, Lodochnyı, Almaty kóshelerindegi sý qubyry jelileriniń qurylysyn júrgizýge qatysty saraptama jasalýda», - deıdi ákim.
