Semeıde órtten kóz jumǵan balalardyń ata-anasymen psıhologtar jumys isteýde

SEMEI. QazAqparat- Semeıde ShQO ákiminiń birinshi orynbasary Ásem Núsipova, Semeı qalasynyń ákimi Ermak Sálimov jáne tótenshe jaǵdaılar basqarmasynyń basshysy Qanat Ábdilovtyń qatysýymen 1 sáýir kúngi órt boıynsha brıfıng ótti. Bul týraly QazAqparat Semeı aqparat ortalyǵyna silteme jasap habarlaıdy.

Budan buryn habarlanǵandaı, 1 sáýir kúni saǵat 14:19-da Sýyqbastaý kenti, Tsvetochnaıa, 3 mekenjaıyndaǵy №1 páterden órt shyǵyp, 4 jəne 7 jastaǵy eki bala ajal qushqan bolatyn. TJB jedel brıgadalary saǵat 14:29-da shaqyrtý ornyna kelip, 2 qabatty turǵyn úıdiń №1 páterinde 5 sharshy metr kóleminde jıhaz janǵanyn anyqtady. Órt sóndirý barysynda 2012 jyly týǵan Edýard Temerkanov pen 2015 jyly týǵan Aleksandr Temerkanovtyń denesi tabyldy. Balalar jedel járdem kelgenge deıin kók tútinge ýlanyp, qaza tapqan.

Qala ákimi Ermak Sálimov birden qaıǵyly oqıǵa ornyna shyǵyp, jaǵdaımen jeke tanysty. Qazirgi ýaqytta otty abaısyz qoldaný, balalardyń otpen oınaýy nemese órteý nusqasy qarastyrylýda. Tergeý sharalary júrgizilip jatyr.

Oqıǵa oryn alǵan ýaqytta balalardyń 28 jastaǵy anasy Anastasııa Temerkanova úıde bolmaǵan. Júkti əıel balalardy úıde qaldyryp, dárigerdiń qabyldaýyna ketken. Al əkesi Vıktor Temerkanov Nur-Sultan qalasynda qurylysshy bolyp jumys isteıtindikten órt ýaqytynda Semeıde bolmaǵan.

«Polıtsııa organdarynyń aqparaty boıynsha, sońǵy jarty jyl ishinde osy mekenjaıda 17.11.2018 jáne 23.02.19 kúnderi eki márte tekseris bolǵan. Ókinishke qaraı, sońǵy tekserý kezinde úı ıeleri polıtsııa men órt sóndirýshilerge esik ashpaǵan»,- delingen aqparat ortalyǵy taratqan habarlamada.

Qazirgi ýaqytta qaıǵy qushaǵyndaǵy otbasymen psıhologtar jumys istep jatyr. Qala ákimdigi balalardy jerleý boıynsha barlyq qajetti sharalardy uıymdastyrady.