Semeıde órtten 55 jastaǵy er adam kóz jumdy
SEMEI. QazAqparat - Semeıde jekemenshik úıden shyqqan órt saldarynan er adam qaza tapty, dep habarlaıdy QazAqparat.
Oqıǵa Jambyl kóshesi, 136 mekenjaıynda ornalasqan jeke sektordaǵy úıde oryn aldy. Jalyn sharpyǵan jalpy aýmaq - 150 sharshy metr. Qutqarýshylar tilsiz jaýdy sóndirý kezinde úı ishinen 55 jastaǵy er adamnyń denesin alyp shyqty. Qazir mamandar órttiń naqty shyǵý sebepteri men shyǵyn kólemin anyqtap jatyr.
«Órtten úı ishindegi jıhaz, kıim-keshek, turmystyq tehnıka men esik-terezeler janyp ketti. Al kóz jumǵan azamat - páter ıesiniń týysqany. Mamandardyń aldyn ala boljamy boıynsha, órt elektr toǵynyń tuıyqtalýynan shyqqan» delingen qalalyq TJB baspasóz qyzmeti taratqan aqparatta.
Aıta keteıik, jyl basynan beri qalada 330 órt oqıǵasy tirkeldi. Saldarynan 6 adam kóz jumǵan. 263 adam qutqarylsa, onyń 56-sy - balalar.
